Raj Bhavan-ah Mizoram leh Arunachal Pradesh-te State puitlinga hlankai an nih lawmna neih a ni

Nimin February 20, 2025 khan 'Ek Bharat Shreshtha Bharat' hmalakna hnuaiah Mizoram Larsap Gen. (Dr) Vijay Kumar Singh hovin Mizoram leh Arunachal Pradesh-te State puitlinga hlankai an nihna 'Foundation Day' lawmna chu Raj Bhavan Durbar Hall-ah buatsaih a ni.

He hunah hian Larsap chuan kalkhawmte chu Mizoram leh Arunachal Pradesh State-te din champha 'Foundation Day' pual chibai bukin duhsakna a hlan a. State pahnihte chu State nuam leh mawi tak, Tribal hnam hrang hrang leh tihdan phung hrang hrang neite inrem taka khawsak hona a nih thu sawiin, hnam bil sawi lova State anga hmasawn tlanna tur ngaihpawimawh a tul thu a sawi a. Hnam ziarang leh tihdan phungte chu min phuarkhawmtu, kaihruaitu leh nihna tichiangtu a nih tlat avangin kalkhawmte chu ngaihlua vawnghim zel turin a chah a ni.

Ek Bharat Shreshtha Bharat programme chuan India rama hnam hrang hrang, tawng, ei leh bar, incheina leh nunphung thlenga danglamte inkara inpumkhatna siam a tum tih Larsap chuan sawiin, “Kan hriatfiah ngai chu kan danglamna hi min thendarhtu tur ni lovin min phuarkhawmtu tur zawk a ni a, hei hian inhriatthiamtawnna min pek bakah ram anga hmasawnna kawng kan zawhna ah pawh hmalam min panpui zawk a ni,” a ti a. India chu khawvel ram dangte awhrawn leh beiseina kawnga entawn berte zinga mi a nih thu pawh sawiin, hei hi kan zavaia thawhhona avang a ni a, India ram hmasawnna hi kan kutah a innghat tlat a ni, a ti a. India ram chu kum 2047-ah ram changkang leh intodelh, 'Vikshit Bharat' a hlankai tum a nih thu pawh sawiin, kalkhawmte chu tum mumal tak neia hemi puitlin thei tura theihtawp chhuah turin a chah a ni.

Raj Bhavan-a hun hman hi Addl. PS to Governor Lalhruaitluangi chuan kaihruaiin he hun an buatsaih chhan te a sawifiah a, Dr. Tawnenga, Principal, Mizoram Christian College (MCC) leh Camdir Tabia Tegi, Mizoram University (MZU) te'n State pahnih chanchin tawi an sawi a. Regional Institute of Paramedical and Nursing Sciences (RIPANS) zirlaite'n Mizo leh Arunachal Pradesh hnam lam an entir a. Hemi hnu hian Governor hian hemi puala kalkhawmte hi kawmin hun hlimawm tak an hmangho a ni.

Northeast Areas (Reorganisation) Act, 1971 hnuaiah kum 1972 khan Mizoram chu Union Territory (UT) a puan a ni a. India ram Danpui siamthat vawi 53-na, kum 1986 hnuah India ram State 23-na ni tura hlankai a ni. Arunachal Pradesh hi North-East Frontier Agency (NEFA) tih niin, kum 1972 khan NEFA chu Union Territory (UT) ah hlankai a ni a. February ni 20, 1987 khan India ram danpui siamthat vawi 55-na, kum 1986 hnuah India ram State 24-na a ni ta a ni.