Finance Commission-a thehluh tur peihfel tawh

Mizoram sawrkar-a Finance Department chuan Finance Commission 16-na hnena Mizoram sum mamawhte lo thlenna tur Memorandum chu an peihfel tawh a, sawihona hnuhnung ber pawh a hmawr an bawk tawh a ni.

Finance Department hotute sawi danin Finance Commission 15-na khan Mizoram tan, a bik takin Post Devolution Revenue Deficit Grant (PDRDG) hmangin kum 2021 leh 2026 inkar chhung atan cheng vbc. 6,544 chauh kum 5 atan Mizoram a ruahman sak a. Hei hian Mizoram sum harsatna a phuhru pha lo hle niin Finance Department hotute chuan an sawi a. Hei bakah hian tualchhung sawrkar inrelbawlna atan cheng vbc. 713 ruahman niin cheng vbc. 259 chu chhiatrupna thlen thulha chhawmdawlna tur leh hriselna lam tan cheng vbc. 115 ruahman a ni bawk.

PDRDG bikah hian Mizoram chu kum 2021-22 atan cheng vbc. 1,790 ruahman sak a ni a, kum 2022-23 tangka kumah cheng vbc. 1,615 ruahman niin kum 2023-24 atan cheng vbc. 1,474 ruahman a ni bawk a, sawrkar kum kallai 2024-25 atan cheng vbc. 1,079 ruahman a ni a. Sawrkar kumthar 2025-26 atan phei chuan PDRDG hnuaiah cheng vbc. 586 chauh Mizoram in a hmu tawh dawn a ni.

Mizoram sum dinhmun hi Covid-19 hrileng khan a tichhe zual nia hriat a ni a, sum hmuh tura beisei lawk cheng vbc. sang tel dawn kim loh a awm a. Hei hi a dinhmun a nih avangin Finance Commission 16-na lakah hian sawrkar beiseina a sang a. Chuti chung chuang eng tiang takin nge sum min ruahmansak ang tih chu a hriat loh thung a ni.