Mizoram sawrkar in Finance Commission 16-na ah cheng vbc. 7541.93 hu hnathawhna a lo dil

Mizoram tlawha rawn zin 16th Finance Commission hnenah Mizoram sawrkar chuan Department 29-te mamawh bik enkawlna leh hnathawhna atan cheng vbc. 7,541 leh nuai 93 a lo dil a. Finance Commission te hian nimin khan Serchhip atanga Lengpui panin Mizoram an chhuahsan a ni.

Finance Department-in Finance Commission 16-na lo zin laia an lo dil hi State Specific Needs under Various Department tia vuahin. PWD hnuaiah cheng vbc. 1,581.01 dilin Department zinga dil tam ber a ni a, a dawtah Health & Family Welfare hnuaiah cheng vbc. 832.65 dil a ni a, a pathumna chu District Council & Minority Affairs tana cheng vbc. 688.83 dil hi a ni. Department tana an dil tlem ber chu SCERT tana cheng vbc. 1.24 a ni. Mizoram sawrkar chuan Finance Commission lo zin hnenah hian tuna chhiah tlingkhawm atanga Central sawrkarin za zela 59 a chang leh State sawrkarin za zela 41-a chang chu inzat a insem nise tiin rawtna an lo thlen a. Hei bakah hian Finance Commission 15-na a tehfunga hman loh, United Nations Sustainable Development Goals leh mipui nitin mamawh man to dan a zira za zela 7.12 ve ve sum pek dan tur tehfunga hman nise tiin rawtna a lo siam bawk a. Chhiatna thlenga State Disaster Respond Fund-in a huam tel loh, kangmei leh leimin vanga chhiatna pawh huam teltir nise tiin tiin a lo rawt bawk a ni.

Finance Commission 15-na khan tehfung hrang hrang a siamah 'Income Distance' an tih mai, kum khata mitin sum lakluh hniamna State tan za zela 45 a hmang a. State a mihring tam zawnga zir kha za zela 15 niin, a State zau zawng pawh za zela 15 hman a ni a. Ramngaw neih zau khan mark 10 a pu a, mihring chengte pun chak leh chak lohin mark 12.5 a pu bawk.

Finance Commission 16-na Member te leh Ofifical te hi nizan hmasa khan Thenzawl-ah an riak a, Serchhip District Bawrhsap Paul L. Khuma'n zanriah a buatsaih sak bakah Mizo ziarang lang thei tura intihhlimna hun buatsaih sak an ni bawk a. Hmun pawimawh hrang hrang tlawhpui an nih hnuah nimin khan Helicopter hmangin Serchhip atanga Lengpui tumhmun thlengin Delhi an pan nghal a ni.