MNF Thalai ten MPSC thuam-chak tawk lo niin sawi

MNF Thalaite chuan Mizoram sawrkar in Mizoram Public Service Commission (MPSC) a thuam chak tawk lo tih an hmuchhuak niin an sawi.

Nimin-a thuchhuah an siamah MNYF Hqrs. chuan nimin khan an Vice President leh General Secretary te chuan MPSC tlawhin MPSC hmalâknate leh an dinhmunte an zirchian thu leh MPSC Chairman leh Secretary-te pawh an kawm thu an sawi a. ZPM sawrkarin ‘MSSSB thiatin MPSC thuamchak a ni ang’ tia an sawi angin Mizoram sawrkarin MPSC a thuam chak lo tih a hmuna kalin an hmuchhuak tih an sawi a, thawktu lakbelh chungchangah leh infrastructure siam belh chungchangah pawh hma an la nep hle nia sawiin, MSSSB thiah a nih hnuah MPSC hnuaia Exam conduct-te result rei tak chhuak thei lovin a awm thin niin an sawi a. “Hei hi thalai hna zawng leh zawng zel tur tam takte tân a pawi êm êm a ni,” an ti a. MNF Sawrkar hmasa hunlaia MSSSB-in Group B chinte result fair tak leh rang taka a tihchhuah thin ang khan MPSC pawh hi Mizoram sawrkar hian rang takin tichakin Exam result tichhuak ve thin se tiin Mizoram sawrkar an phut thu an sawi bawk.

MNYF thuchhuah chuan, “MPSC kan thuam chak ang tia sawrkarin a lo tiam tawh ang ngeiin thawktute pawh lakbelha an mamawh ang te phuhru turte, Exam Conduct apianga School building hman ngai lo tura ruahmanna thar siama, MPSC Exam Hall building zau tha zawk buatsaih sak se tiin Mizoram sawrkar kan phût,” an ti a. A thawktu (manpower) Assistant 2, UDC 1, LDC 5 leh Group D a pek belh te chu a lawmawm em em tih sawiin, “Hei bakah hian an mamawh ang zel a thuamchak turin kan phut a, duh khawp awm si lova a thu chauha thuam chak lo turin sawrkar kan phut bawk a ni,” tiin ZPM sawrkarin zirchianna nei miah lova MSSSB a thiah pawizia an hmuchhuak chiang hle niin an sawi bawk.