Larsap in mipuite chibai buk

Mizoram Larsap Gen (Rtd) Vijay Kumar Singh chuan Mizoram Statehood Day pualin Mizo-ram mipuite chibai a buk.

Larsap chuan February ni 20, 1987 khan Mizoram chu India ram State 23-na ni tura hlankai niin, he ni pawimawh tak hi Mizoram tana hmasawnna, remna leh hlawhtlinna tura bultanna thar duhawm tak a ni tih a sawi a, He ni hi tuarchhelna, inpumkhatna leh Mizo mipuite beiseina a taka chantirna leh nemnghehna a ni a. Inbiakna leh mipui thlan rorelna kaltlanga hnehna lantir niin, hemi avang hian Mizoram Peace Accord chu June ni 30, 1986 khan India Sawrkar leh Mizo National Front te chuan an ziak a; hei hi India ram chanchina inremna hlawhtling bera ni hiala ngaih a nih thu a sawi a ni. 

Larsap chuan State a hlankai a nih hnuah Mizoram in zirna, hriselna, hmasawnna ruhrel siam leh nitin khawsak kawngah hmasawnna chhin-chhiah tlak tak tak a nei tih sawiin, Kan hnam ziarang hausa takte, nunphung nghet tha tak bakah lungrual leh inpawh tlang taka kan khawsak hona te hian ram pum a fan hneh hle a ni tih a sawi.

Sawrkar laipui program, India ram State leh Union Territory hrang hranga chengte inkara inhriatthiam tawnna leh inpumkhatna tizual tura hmalakna, 'Ek Bharat Shreshtha Bharat' chuan hnam hrang hrangte inkarah inunauna leh inpumkhatna a siam tih Larsap chuan sawiin a, India khua leh tui kan nihna tihfiah zual a tum tih a sawi a, India khua leh tui inpumkhatna tura hmalakna, 'Ek Bharat ShreshthaBharat' thil tumte hre reng chungin, midangte hnamziarang leh nunphungte inngaihven saka inzirtawn turin a sawm a. Mahni hnam ziarang leh nunphungte hloh then chuang hauh lovin hnam inpumkhatna hi a kalpui theih reng tih pawh sawiin, ram leh hnam rohlute vawnghim chung zelin, chhuan lo la awm tur te hmakhaw ngai chung zelin lungrual takin hna thawk tlang zel turin a sawm bawk.