Gauhati High Court Judge in Champhai tlawh

Gauhati High Court Judge, Justice Marli Vankung chuan Inrinni khan Champhai Dinthar Veng-a Judicial Quarters sakna tur hmunhma leh Champhai Vengsang-a District Court Building thar sak mek te tlawhin Khawzawl District Court leh Judicial Quarters sakna tur hmunhma te pawh a tlawh bawk.

Justice Marli Vankung-in Champhai District Court a tlawhna ah hian Liansangzuala, District & Sessions Judge chuan Champhai Judicial District dinhmun sawifiahin, Champhai Judicial District hi November ni 11, 2021 khan hawn a ni a, tun dinhmunah District & Sessions Judge hovin Civil Judge Sr. Division (Chief Judicial Magistrate) pakhat leh Civil Judge Jr. Division (Judicial Magistrate First Class) pakhat ten an thutchilh a. Judge Post 7 ruahman atangin post ruak pali a awm mek a; Supporting staff post 23 awmah post 13 hnawhkhawh tawh a ni a, post 10 a la ruak mek a ni. Champhai District Court hian December 2024 leh January 2025 chhung khan Case 241 an chingfel a. Tun dinhmunah Case kal lai 647 a awm a, heng zinga Case 344 (53%) chu ND&PS Act kaihhnawih a ni.

Champhai Vengsang-a District Court Building sak mekah hian hna za zela 42% thawh zawh tawh a ni a. Dinthar Veng-ah Judicial Quarters Grade–II pahnih leh Grade–III pahnih sa turin ruahmanna a kal mek a ni.