Bana Kaih Scheme tum ber Viksit Bharat 2047 leh SDGs hlawhtlinna kawnga tha thawh ve a ni - Larsap

Mizoram Legislative Assembly 9-na thutkhawm vawi 4-na leh Budget Session ni bawk chu nimin khan neih tan a ni a. Larsap Gen. (Rtd) Vijay Kumar Singh chuan Bana Kaih Scheme in a tum ber chu Viksit Bharat 2047 leh United Nations Sustainable Development Goals (SDGs) hlawhtlinna kawnga tha thawh ve a nih thu a sawi a ni.

Aizawl-a Assembly House-a Budget Session neih tan ni hian Larsap Gen (Rtd) Vijay Kumar Singh chuan Member te hmaah thu sawiin, Legislative Assembly Annual Budget Session chu Sawrkar pawisa lut leh chhuak tarlanna satliah mai nilo, mipuite tana Sawrkar hmachhawp leh ruahmanna te tarlanna a nih thu sawiin, Assembly Session-a thil sawiho leh rel te chuan mipui tan hmasawnna a thlen ngei a beisei thu a sawi a. Mizoram Legislative Assembly-in rorelna kalphung zahawm tak vawnhim kawngah sulhnu duhawm tak a lo nei tawh thin tih sawiin, <ember-te chu he sulhnu chhuanawm tak hi chhawmnung zel turin a sawm a ni.

Larsap chuan sawrkar hmalakna leh hmachhawp hrang hrangte sawiin, Mizoram Sawrkar Flagship Program, Bana Kaih in a tum ber chu India in kum 100-a tlin huna ram hmasawn a nihna tura tha thawh ve tur leh Mizoram chu hmasawn zinga a tel ve theihna tur a ni tih sawiin, kuthnathawktuten intodelhna tlak eizawnna ngelnghet an neih theih nan leh hmasawnna rualkhai siam nan ruahmanna hrang hrang a chhawmdawl tum an ni tih a sawi a, hmasawnna chu mitin thleng phak a nih theih nan hmalak a nih thu a sawi a. Bana Kaih hmalakna kalpui dan tur hlawm 5-ah then a ni tih sawiin, heng zingah hian sawrkar thawhpui Bank leh Financial Institution ten Progress Partner te hnenah Loan an pe dawn a, heng mi te tan hian sawrkar chuan Credit Guarantee Scheme awmsa hmangin Guarantor-ah a tang dawn a, hemi atan hian sawrkar chuan Bank pathum - State Bank of India (SBI), Mizoram Rural Bank (MRB) leh Mizoram Cooperative Apex Bank Ltd (MCAB) te chu inremna thuthlung a ziahpui tawh tih a sawi a, Handholding Policy hnuaiah Chief Minister's Special Category Scheme siam a nih thu pawh a sawi bawk a ni.

Bana Kaih hmalakna hnuaiah Mizoram sawrkar chuan Minimum Support Price (MSP) chu thlai chi li – Sawhthing, Hmunphiah, Aieng leh Mizo Hmarcha-ah a ruahman thu Larsap chuan sawiin, Kuthnathawktu ten sawrkar rate bituk anga hralhna an hmuh loh chuan sawrkar rate bituk a phak lohna hi sawrkar chuan a hnawh-khah sak dawn tih a sawi bawk.

Larsap chuan ram hmasawnna atan remna leh muanna vawnhim chu thil pawimawh tak a ni tih sawiin, Mizoram Police ten rim taka khua leh tui te venhim hna an thawh zarah kum 2024 chhungin Mizoram chhungah dan leh thupek kenkawh kawngah harsatna lian tham thleng a awm lo tih a sawi a, Mizoram Police te chuan State dang nena ramri-ah harsatna a thlen loh nan ngawrh takin hna an thawk reng tih pawh sawiin, ramdang te nena ramri venghim turin Assam Rifles leh Border Security Force te nen tanghoin venhimna hna khauh takin an kalpui thin thu a sawi bawk a ni.

Larsap Gen (Rtd) Vijay Kumar Singh chuan Home Department-ah hmasawnna hrang hrang hmuh tur a awm thu sawiin, Police hmunhma leh hmanrua bakah Police awmna hmun thuamthat hna nasa takin thawh a ni tih a sawi a, Mizoram Home Guard Volunteers te Rifle Allowances chu Rs. 100 a tihpun a ni tawh dawn thu a sawi a, Khawtlang ralmuanna leh mipuite himna kawnga hmalakna kal zelah Mizoram FSL chuan ND&PS Act leh BNSS 187 in a phut angin, thubuai chinfel loh an nei lo a. Eng thubuai pawh ni 30 chhung ngeia chingfel turin huntiam nghet tak an vawng tih a sawi bawk.

Nimin thutkhawm ah hian Larsap thu-sawi chungchanga lawmthu sawina Motion chu putluh niin inkhawm hi tihtawp nghal a ni.