Serchhip-ah District Skill Committee thukhawm

Serchhip District Skill Committee chu nimin khan an Chairman leh Bawrhsap Paul L. Khuma hovin Serchhip DC Meeting Hall-ah an thukhawm a, an hmalakna hrang hrang thlirho a ni.
Nimin-a thutkhawm ah hian Serchhip District Skill Development Plan 2024-2025 ruahmanna thlirho in Serchhip District chu India rama ziak leh chhiar thiam percentage sanna ber ni mahse eizawnna hlawk leh ngelnghet neih kawngah hmasawnna tur a la ngah hle a. Chuvangin, Serchhip District chhunga Department hrang hrang kalkhawm te chuan an Department kaltlanga sawrkar laipuiin mipui tana Scheme a kalpui mek te tangkai lehzuala hman dan turte an enho a ni.

He hunah hian Member ten Scheme an kalpui dan leh an dinhmun an tarlang a. Pradhan Mantri Kaushal Vikas Yojana (PMKVY), Deen Dayal Upadhyaya Grameen Kaushalya Yojana (DDU-GKY) leh Deen Dayal Antyodaya Yojana - National Urban Livelihood Mission (DAY-NULM) Scheme hmanga Serchhip District chhung khaw hrang hranga thalai te, lehkhathiam hna nei lo te leh hmeichhiaten eizawnna tha zawk an neih theihna tura hma an lak dan leh hma an lak tawhna report te ngaihthlak a ni.

Heng Scheme hrang hrangte mai bakah sawrkar laipui atanga mipuite tana hmasawnna sum lo kal khawihtu Department te thawkho in Serchhip District tan District Skill Development Plan 2024-2025 hi duan a ni a. Addl. DC Lalrinzuala kaihhruaina hnuaiah Sub-Committee siam a ni a. Plan buatsaih tawh hi chipchiar taka thlirho leh sawiho a nih hnuah siamrem ngai te siamrem a belh ngai te belh leh nise an ti a ni.