Best Field Functionaries Award hlanna neih a ni

Directorate of Women & Child Developmet chuan Field Level-a Hnathawk tha chawimawina, Best Field Functionaries Award chu nimin khan semin Social Welfare, Tribal Affairs, Women & Child Development Minister Lalrinpuii chuan he hun hi a hmanpui a ni.

Taxation Auditorium-a he hun hman ah hian Minister Lalrinpuii chuan kum 1972 atanga Mizoram-a Integrated Child Development Scheme (ICDS) lo than chhoh dan leh chumi atana Field Functionaries-te pawimawhnate a sawi a. Anganwadi Centre-te pawimawhna tarlangin, khawtlang mipuite nena thawhona tha lehzual nei thei turin Coordination Committee, Mothers Committee leh Poshan Panchayat-te chu thawhhona an neih mek te chhawmnung zel turin Field Functionaries-te chu a chah a. Award dawngtute chu tang lehzual sauh sauh tura chahin, a la dawng ve chiah lo te pawh dawng ve ngei tura theihtawp chhuah zel turin a fuih nghal bawk a ni.

Nimin-a he hun hman hi Social Welfare Tribal Affairs, Women & Child Development changtu Commissioner & Secretary Lalzarmawii IAS chuan kaihruaiin Mission Saksham Anganwadi & POSHAN 2.0 chungchang leh Best Field Functionaries Award chungchang a sawifiah a, Women & Child Development Director Zoramthangi Chhangte chuan POSHAN 2.0 hnuaia hmalakna hrang hrang thlirletna hun a hmang bawk.

Nimin-a Best Field Functionaries Award semna ah hian Category 7-ah chawimawina hi sem a ni a, Serchhip District atangin Juliet Lalrempuii, DPA chuan Best District Project Assistant (POSHAN 2.0)-ah chawimawina hi a dawng a ni.