Sawhthing leh Hmunphiah te lei vek a nih dawn thu Chief Minister in a sawi

Chief Minister Lalduhoma chuan kuthnathawktuten Sawhthing an hralhna tur ruahmanna fel tak siam a nih tawh tih sawiin, Sawhthing chingtuten an thar ang angte a bo abang awm lova an hralh vek tur thu a sawi a. Sawrkar in ruahmanna a siam angin naktuk atangin Sawhthing hi lei tan tum a ni.

ZPM Legislature Party thutkhawm nimin-a Assembly Conference Hall-a neihah Chief Minister Lalduhoma chuan Sawhthing lei tura sawrkar hmalakna hi sawiin, Mizoram-a Secondary Sollection Centre 62 atanga Sawhthing hralh tur a nih thu a sawi a, kuthnathawktuten Sawhthing an hralhna tur ruahmanna fel tak siam a nih tawh thu leh Sawhthing chingtuten an thar ang angte a bo abang awm lova an hralh vek tur thu a sawi a, a rual a chawh vek a rem loh chang a awm a nih pawhin a ruahmantute thu leh hla lo ngaichang thiam turin kuthnawthawktute chu a chah bawk. Chief Minister chuan Hmunphiah hralh mek a nih thu sawi lang bawkin, Empanelled Buyer ten Grade A an duhkhawp lei tur an hmuh loh chhante enzui mek a nih thu a sawi a, Hmunphiah hralh thei lo an awm a nih chuan sawrkarin March thla chhungin a lei vek dawn tih a sawi bawk.

Hetihlai hian Serchhip District Bawrhsap leh District Agriculture Marketing Committee (DAMC) Chairman chuan nimin khan Secondary Collection Centre (SCC) atanga Sawhthing lei dan tur ruahmanna tichhuakin Sawhthing hi SCC-ah kg khat zelah Rs. 50/- in lei a nih dawn thu leh DAMC chuan SCC atanga finfiahna a neih hnuah mimal Bank Account-ah pawisa hi pein Sawhthing lei man hi DAMC in a lei atanga ni 7 (sarih) chhungin a pechhuak ang tih a tarlang a. SCC atanga Buffer Stock Point thlenga phurh man chu MAMB in a tum tur thu te, Bukna khawl MAMB in leiin SCC ten khawl man hi MAMB hnenah an pek let tur a nih thu leh SCC Co-ordinator ten SCC a thawktu turte chu an hnathawh dan tur hrang hrangte an zirtir tur thu te a tarlang bawk a ni.