Tun term-a LADC CEM 4-na tur Vawiin ah lakluh tum a ni

Lai Autonomous District Council (LADC) term kal meka Chief Executive Member (CEM) palina turin V. Zirsanga chu Vawiin hian lakluh tura ruahman a ni a, V. Zirsanga hi tun Term-a CEM a nih tum hnihna tur a ni bawk.

Kum 2020-a LADC Inthlanpui neih ah khan MNF chuan MDC Bial 25-ah Bial 20 lain chiang takin hnehna an chang a. MNF Legislature Party chuan Manghmunga Chinzah kaihhruaina hnuaiah Sawrkarna siamin December 14, 2020-ah CEM atan lakluh a ni. August 27, 2021 ah MNF Legislature Party atang thovin V. Zirsanga chuan Manghmunga Chinzah paihthla in CEM atan lakluh a ni ve leh a. V. Zirsanga hi nikum January ni 22-a Special Court (Prevention of Corruption)-in eiruk thubuai a thiam loh chantira kum 4 tang tur leh cheng nuai 4 chawi tura a tih hnu lawkah LADC sawrkarah buaina a tawk chho leh a ni,

V. Zirsanga laka hel MNF MDC 8 leh eptu lamin eiruk thubuai a thiamloh a chan avanga paihthlak an tum laiin nikum March ni 7 khan CEM V. Zirsanga chuan banna a thehlut a. Sawrkar kal mumal thei lova hun engemaw chen a awm hnuah thla khat leh a chanve vel chu LADC hi Governor's Rule-ah dah a ni a. Hemi hnu hian Congress leh MNF ten Sawrkar intawm siamin nikum May 7, 2024 khan C. Lalmuanthanga chu CEM-ah lalutin sawrkar thar siam a ni leh a. Hun engemaw chen sawrkar hi a kal hnuah kumin February 12 khan LADC sawrkar fiahna hi neih tura tih a ni a. Amaherawh chu CEM nilai C. Lal-muanthanga hian banna a thehluh tak zawk avangin a sawrkar hi a tlu leh a. Hemi hnu hian MDC 10 nei ZPM chu BJP MDC ni thin T. Zakunga leh MNF MDC pahnih V. Zirsanga leh Lallawmsanga Apetow te'n an zawm tak avangin ZPM hian sawrkar siam tumin a tum khatna atan LADC-ah ZPM sawrkar a ding dawn ta niin a lang.