HIV dona atan MLA ten Rs. 50,000 hlan dawn

Mizoram State-a Dan siamtu (Legislator) ten HIV/AIDS lama hma an lakna tur Committee sang, Mizoram Legislative Forum on AIDS chu nimin khan Health Minister Lalrinpuii hovin an thukhawm a, MLA te hian MLA Fund atanga Rs. 50,000/- theuh thawh an remti bawk.

I&PR Conference Hall, Aizawl-a thutkhawm ah hian Health Minister Lalrinpuii chuan HIV chungchanga Mizoram dinhmun chu mipui nawlpuiin kan vei a tul tawh zia sawiin, Legislator te pawhin tun aia nasaa hma an lak a pawimawh tawh tak meuh thu a sawi a. India rama HIV hluar dan (prevalence rate) 0.2% anih lain Mizoram State chu a sang ber niin a hluar dan chu 2.73% a ni tih a sawi a ni.

MSACS Project Director Dr. Jane R. Ralte chuan Mizoram HIV dinhmun report pein January 2025 thleng HIV kai mi 32,287 hmuhchhuah an ni tawh a. He natna avanga thi hi hriat theih chinah 5511 an tling tawh tih sawiin, nikum 2024 April leh kumin 2025 January chhungin HIV 1769 hmuhchhuah an ni tawh tih a tarlang bawk a. Nikum April leh kumin January inkara HIV kai thar hmuhchhuah zat atanga za zela 67 chu invenna tel lova sex hman atangin a ni a, hriau thlianghlim lo inhmantawm atanga kai hi za za zela 30.44 an ni a. Mizoram chu HIV natna avanga hun engemaw chen a thalo zawngin langsar mah ila, tunhnai ah hmasawnna hmuh tur duhawm tak tak a awm ve zel a, natna hrik kai thar an tlakhniam bakah he natna avanga thi nasa taka an tlem tawh thu MSACS Project Director chuan a sawi bawk.

Health Minister hova MLA leh MSACS aiawh thenkhatte inkawm khawmnaah hian MLA te hian HIV darh zel tur dona kawnga tha thawh an inhuam thu sawiin, kum 2024-2025 chhungin MLA Fund atangin Rs. 50,000/- theuh HIV hrik kai ten chatlak lova ART damdawi an lak theih nan, ART panna tur senso atan MSACS hnena hlan an remti bawk a ni.