Ration Card Sen nei 7,652 awm tawh

Mizoram sawrkarin AAY leh PHH a tel lo, chhungkaw harsa bikte tan a bika Ration Card a buatsaih, Ration Card Sen, Mizoram State Special Ration Package-ah chhungkaw 7,652 dah an ni tawh.

Food, Civil Supplies and Consumer Affairs Department a thawktute sawi danin Card Sen mamawhte tan form awmsa hmangin mahni bialtu DCSO-ah dil theih a ni a. Card Sen neite chuan buhfai kg-ah Rs. 20-in an khul thei a. Tun dinhmunah Mizoram-ah Non NFSA Card 1,06,589, PHH (Card Pawl) 1,50,555, AAY (card eng) 25,750 an awm mek a ni. Hetihlai hian Ration lakna atana hman ni lo NER (Not Entitled Ration Card) 206 a awm mek bawk a. Heng Ration Card hi document atan chauha hman tur a ni.

FCS&CA Department chuan Group ‘A’ Officer-te chu NER-a dah vek turin ruahmanna a siam mek a, Department hrang hrangah Group ‘A’ chin list an dil mek nia thudawn a ni.