Nikum chhungin Malaria vei 16,899 hmuh a ni

Nikum (2024) chhung khan Mizoram-ah Malaria vei mi 16,899 hmuhchhuah an ni a, mi 7 in an thih phah bawk.

H&FW Department hnuaia National Vector Borne Disease Control Programme (NVBDCP) chuan nimin khan Aizawl-a DHME Auditorium-ah kum kalta chhunga an hmalakna thlirletna hun an hmang a, he hunah hian Malaria, Dengue leh Chikungunya-a Mizoram dinhmun tarlan niin nikum chhung khan Mizoram pumah Malaria vei mi 16,899 awmin chung zinga 8950 te chu Malaria PF an ni a, Malaria natna avangin mi 7 in nunna an chan a ni. Nikum chhung hian kumdang zawng aiin Malaria PV a pung ni a report a ni bawk. Kum 2024 chhung khan Dengue vei hmuhchhuah zat chu mi 744 niin Chikungunya vei hmuhchhuah mi 3 an awm thu tarlan a ni bawk.

Mizoram-ah hian District 4- Lawngtlai, Lunglei, Mamit leh Siaha District te chu Malaria tam zual bikna te an ni a, a bikin International Border- Bangladesh leh Myanmar ramri hrul ah te Malaria hi a tam zual ni he hunah hian tarlan a ni bawk a. NVBDCP hnuaiah hian Malaria natna laka invenna heng:Tthosilen damdawi-a chiahsa sem te, Thosilen pangngai damdawi a Chiah sak te leh chenna Inchhung Thosi hlo a kah te kalpui a ni bawk.

Nimin-a State Review Meeting hi Director of Health Services Dr. Hmingthanmawii chuan kaihruaiin Mizoram chu India ram State hrang hrang zinga Malaria tamna ber State a nih thu leh thawktuten an awmna hmun theuh ah tha thlah lova an beih zel a pawimawh thu a sawi a. Dr Chawng-thanchhunga, Addl Director (Malaria) State Programme Officer (NVBDCP) chuan report a pe bawk a ni.