Larsap in House-ah sawrkar hmalakna a tarlang

Mizoram Larsap Gen. (Rtd) Vijay Kumar Singh chuan Sethawn-a Jordan Centre, ruihhlo ngawlveite enkawlna hna thawk duh te tana Expression of Interest (EOI) thehlut turin sawmna tihchhuah a ni tawh tih a sawi.

Larsap hian nimin-a Assembly Budget Session-a thu a sawina ah Jordan Centre, Sethawn-a ruihhlo ngawlveite enkawlna hna thawk duh te tana Expression of Interest (EOI) thehlut tura sawmna tihchhuah a nih tawh thu hi a sawi a, Ruihhlo khuahkhirh leh tirem tur hian Excise & Narcotics Department chuan theihtawp a chhuah thu pawh sawiin, chumi zarah chuan tun sawrkar kum kal mekah hian ruihhlo zuar mi 600 man niin NDPS Act 1985 hnuaiah thubuai 441 ziahluh a ni a, damdawi ruihhlo chi hrang hrang kg 429.116-a rit man a ni tih a sawi bawk. 

Larsap chuan nikum September 2024 atanga Ruang phurh kalpui anih hnuah mi 238 in tanpuina an dawng tawh tih a sawi a, an Bank Account-ah thun mai thin a ni tih sawiin, a vaiin Rs. 23,33,314/- pekchhuah a ni tawh tih a sawi a, Ruang phurhna atan State Annual Budget 2024-25 ah cheng nuai 500 dahhran a ni tih sawiin, a tirah Milometre khat zelah Rs. 35/- bituk a ni a, a hnuah Rs. 40/- ah tihsan a ni tih sawiin, nikum December ni 23-ah rate thar hman tan a ni tih a sawi bawk.

Larsap chuan Mizoram pumah Eklavya Model Residential School (EMRS) 11 a ding tawh tih pawh sawiin, State Action Plan hnuaia upa zawk enkawl thiam bik zirtirna pekna tur ‘Creation of Pool of Trained Geriatric Caregivers’ kalpui turin RIPANS chu Training partner atana thlan an ni tih a sawi a, Batch pahnih (2) in training an zo tawh tih a sawi bawk.

Larsap chuan School Education Department hmalakna pawh tarlangin, Zirtirtu indaihlohna siamthat nan Primary School zirtirtu 648, Middle School zirtirtu 371 leh High School zirtirtu 350 te chu Casual Teacher ni turin rawih an nih thu a sawi a, hei hian Zirtirtu indaihlohna a chinfel a beisei thu a sawi a. Non-Teaching Staff te pawh indaihlohna a nasa tih hriat niin School Education Department chu Group D staff 36 la turin a inbuatsaih mek tih a sawi bawk.

Tharchhuah hlawk zawk siam tura thlai chin dan kalphung tha leh ngelnghet zawk siam turin a sawrkar chuan hma a la tih pawh Larsap chuan sawiin, Agriculture tihhmasawn chu ngaihpawimawh berah a nei mek zel tih a sawi a. Champhai, Mamit, Serchhip, Kolasib, Khawzawl leh Saitual District-a kuthnathawk chhungkua 55,000 te sum lakluh tipung turin sik leh sa inthlak dawl zo ruahmanna (Climate Resilience Agriculture System) chu Fostering Climate Resilient Upland Farming System (FOCUS) Project hnuaiah a kalpui a nih thu leh kum 2024-25 chhung hian hectare 2500-a zauah Oil Palm chin tum a nih thu a sawi bawk.