Voluntary Vehicle Modernization Policy hnuaiah Department 17 te lirthei 27 hlan an ni

Ministry of Road Transport and Highways (MoRTH) in lirthei hlui tawh te hluihlawna, a thar a thlak tura lirthei neitute tana ruahmanna a siam, Voluntary Vehicle Modernization Policy (V-VMP) hnuaiah Transport Minister Vanlalhlana chuan nimin khan Department 17 te hnenah lirthei thar 27 a hlan.

Vehicle Scrapping Policy (VSP) tia hriat bawk Voluntary Vehicle Modernization Policy (V-VMP) hnuaia lirthei inhlanna hun hi Chaltlang a Transport Department Complex-ah hman niin he hunah hian Transport Minister chuan Voluntary Vehicle Modernization Policy (V-VMP) ah sawrkar Department 17 tan lirthei thar 27 lai mai an semchhuak tur chu lawmawm a tih thu sawiin, “Vawiina kan motor semchhuah te hi SASCI sum hmanga lei a ni a, Transport Department chuan he incentive hi mahni Department bil atan hmang mai lovin, GAD nen tangkawpin tun ang hun duhawm hi kan lo thleng ta a ni,” a ti a. Department 17 aiawha lo kalte hnenah lirthei Document pawimawh a hlan nghal a ni.

Transport Secretary Zosangliana kaihhruaia he hun hman ah hian Transport Department Director Er. R. Lalrammawia chuan Technical Report pein V-VMP in a tum chu Air Polution tih tlem te, kan Environment te tithianghlima lirthei hlui tawh lutuk avanga chetsualna thleng thin te tihtlem bakah Fuel efficiency tihsana Maintenance Cost tih tlem te a nih thu a sawi a. He VSP hian Commercial and Passenger Vehicles fit tawh lo te mahni thu a hluihlawn tir te, sawrkar lirthei kum 15 aia upa tawh chu registration ti thih vek (De-Registration) te a tum thu sawiin, hetah hian Private leh sawrkar lirthei kum 15 la ting lo pawh Automated Testing Stations (ATSs) in fit lo a ti chuan a huam vek tih a sawi a, hei bakah hian Private lirthei kum 20 tling tawh Registration tih thi vek te pawha tel thu a sawi a. “Chuvangin Department tin ten RVSFs peifel hma chuan kan lirthei kum 15 tling tawh chu Normal Condemnation lo ti vek turin ka ngen duh che u a ni,” a ti bawk.

MoRTH hian V-VMP kalpuina ah hian Mellung hrang hrang siamin pakhat tih hlawhtlin hian incentive cheng vbc. 3 a pe a, Mizoram hian mellung pakhat ti hlawhtlingin lawmman hi a dawng a ni. Heng lirthei 27 hi Government e-Marketplace (GeM) atanga lei vek a ni a, a lei nan hian cheng vbc. 2.4 sengin, thil tul dang hrang hrang nen cheng vbc. 2.8 a seng a ni.