National Highway-302 siam mek a hmunah enfiah

Lunglei leh Tlabung inkar National Highway-302 kawngpui laih zauh hna thawh mek dinhmun chu nimin khan Lunglei District Deputy Commissioner ruahmannaa din, Inspection Team te chuan a hmunah an enfiah.

Inspection team hi Addl. DC & Competent Authority for Land Acquisition (CALA) Rochuangkimi Khenglawt chuan hovin kawngpui zauh hna thawh mek enkawltu National Highways & Infrastructure Development Corporation Limited (NHIDCL) hotute leh hna thawktu Contractor-te'n lo dawngsawngin, an hnatthawh mek dinhmun leh hmachhawp te an lo hrilhfiah a. Kawng laih hna leh kawng luan hna thawh mek dinhmun te, leivung paihna hmun te, Chhumkhum, Lungsen leh Tuichawng-a khaw chhung helna kawng (by-pass road) siam mek te en hovin, kawng siam nana hman tur lung lakna hmun (quarry) bakah kawng siam nana hmanraw hmante a that tawk leh that tawk loh endikna Constructions & Project Quality Control Laboratory hmun te an tlawh bawk a ni.

NH-302 kawngpui zauh hna thawh mek hi Hrangchalkawn atanga Tlabung thleng niin kawng hluiah chuan kilometre (KM) 96-a thui a ni a. Tuna kawng thar ruahman ang chuan KM 75.070-a thui tur niin, package hnih-ah then a ni a. Package A hi Hrangchalkawn atanga Chhumkhum thleng niin, KM 37.420-a thui a ni a; Package B hi Chhumkhum atanga Tlabung thleng niin, KM 37.650-a thui a ni thung.

NH-302 kawngpui zauh leh siam that hna hi BRN Infrastructures Private Limited (BRNIPL) te'n thawkin, tun dinhmunah Package A-ah 50% leh Package B-ah 50% an zo tawh a. Kawng laih leh kawng luan bakah, lui kawr kanna tur Lei dawh tur pali (major bridge 3 leh minor bridge 1) awm bawkin, Lei dawh hna pawh hi thawh tan mek a ni.