Union MoS for Road Transport in Saitual a tlawh

Union Minister of State for Road Transport & Highways leh Corporate Affairs Harsh Malhotra chuan nimin khan Saitual tlawhin sawrkar hotu lu te leh khawtlang hruaitute a kawm.

Saitual tlawhtu Union Minister of State Harsh Malhotra hian nimin chawhma lam khan Saitual DC Conference Hall-ah Saitual-a District Office hotute, VC leh NGO hruaitute a kawm a, Sawrkar laipui atanga Saitual District tlawh hmasa bertu a ni thei chu lawmawm a tih thu sawiin, mipui ten tha taka an lo dawnsawnnaah lawmthu a sawi a. Sawrkar laipui hmalakna (Central Scheme) hrang hrang, a bikin, Mahatma Gandhi National Rural Employment Guarantee Act (MGNREGA), Pradhan Mantri Awas Yojana (PMAY), Jal Jeevan Mission (JJM) leh Mid-day Meal te Saitual District-ah tha taka kalpui a ni chu lawmawm a tih thu a sawi a. Harsatna an tawh te ngaihthlakna hun tha a nei thei chu lawmawm a tih thu sawiin, kalkhawmte chu an mamawh te ziaka thlen turin a chah a, a theih anga hma laksak a tum thu a sawi bawk.

Officials te leh khawtlang hruaitute nen inkawm zawh hian Harsh Malhotra chuan Saitual District Hospital tlawhin OPD leh Ward te a fan bakah Hospital mamawh te enfiah a, Senior MO Dr. Zothanpari Chhakchhuak chuan lo dawngsawngin Saitual Govt. High School a tlawh zui nghal a, Netaji Subhash Chandra Bose Avasiya Vidyalaya (NSCBAV) Hostel te, Vocational Educational building leh Science Lab. te a fang a, Saitual DEO Micky R. Lalenkawla chuan a lo dawngsawng a ni. Hemi hnu hian Union Minister hian Tamdil tlawh lehin DFDO Zomuansangi nen an inkawm a, sawrkar laipui Scheme hnuaia Fisheries Department hnathawh hrang hrangte leh an ruahmanna te sawiin, hemi hnu hian Aizawl lam a pan leh nghal a ni.