Dahkham ngai lova loan lak theihna turin hma la

Mizoram Sawrkar chuan CGTMSE (Credit Guarantee Fund Trust for Micro and Small Enterprises) Scheme chungchangah nimin khan SIDBI nen thawhhona thuthlung, Memorandum of Agreement a ziak a. Mizoram State Policy Coordination Committee Vice Chairman Dr. KC. Lalmalsawmzauva hmaah MoA hi Commissioner and Secretary, Commerce & Industries Dr. Lalzirmawia Chhangte leh CGTMSE CEO Manish Sinha ten an ziak a ni.

CGTMSE hi Sawrkar laipui-a Ministry of Micro, Small & Medium Enterprises (MSME) leh SIDBI in MSME te tan Manufacturing leh service pek kaihhnaih eizawnna hrang hrang, lian tham si lo te’n an hmalakna atana sum mamawh phuhruk tura awlsam zawka loan an lak theih nana ruahman leh kalpui a ni a. CGTMSE hnuaiah hian MSME loan la te chu an loan lak atanga 75-85% thleng Guarantee pek sak a ni thin a; hemi atan hian loan latu in fee a chawi a ngai thin. Bank lam tan risk a la san deuh avangin loan dilna tam tak hnawl a lo ni tawh thin a. SIDBI nena Mizoram sawrkar MoA hnuaiah hian Mizoram Bana Kaih (Handholding) Scheme 2024 atangin 95% thleng Guarantee tihsan a nih dawn bakah Mizoram sawrkar chuan Guarantee fee a tum sak vek dawn avangin dahkham leh Guarantor ngai lovin awlsam zawkin loan a lak theih dawn a ni.

Memorandum of Agreement ziahna hunah hian Mizoram State Policy Coordination Committee Vice Chairman Dr. KC. Lalmalsawmzauva chuan Progress Partner-te Ban a kaihna tur hian Mizoram sawrkar chuan loan rul tha te chu loan pung an rulhna a rulh let zel tur thu a sawi a. MoA ziah zawh hian CGTMSE chungchang sawifiahna presentation pek a ni bawk.