MPCC in thlai humhalhna dan an sawifiah

Mizoram Pradesh Congress Committee (MPCC) chuan nimin khan Aizawl Press Club-ah thuthar thehdarhtute kawmin ‘The Mizoram Agricultural Produces (Restriction on Movement) order 1994’ chungchang an sawifiah.

Nimin-a thuthar thehdarhtute an kawmna ah hian Congress Party chuan he dan in a tum ber chu kan kut hnathawktuten ramchhunga an thlai thar thenkhatte an hralhnaah harsatna hrang hrang 'Middle-Men' te an lo in rawlh thin vanga an tawh thinte laka anmahni humhalhna a nih ber thu an sawi a, he dan in a humhalh thlai te chu Iskut, Sawhthing, Hmarcha, Chhawhchhi leh La (Cotton) te a nih thu sawiin, he dan hian phalna bik nei lo te tan chuan heng thlai thlan bik pangate chu State pawna phurhchhuah a remti lo tih an sawi a. He dan hi kum 1998-a MNF a sawrkar khan ennawn a ni a, siamthat niin ‘The Mizoram Agriculture Products (Prohibition of Movement) (Amendment) order 1999’ chuan a rawn thlak ta tih an tarlang bawk.

Congress Party chuan eng Party pawh sawrkar sela kut hnathawktu te dawmkanna Programme reng reng chu an thlawp tih sawiin, ZPM sawrkarin tuna Sawhthing an lei tan danah hi chuan ngaih that lohna tam tak a awm thei dawn nia a lan thu an sawi a, Chief Minister-in Feb. ni 21, 2025-a House a Sawhthing chungchanga a thusawite chuan Sawhthing thartute tihnual lo hram se an duh thu an sawi bawk a ni.