PM-SGMBY hnuaiah Rooftop Solar bun te hnenah Mizoram sawrkar in subsidy sum a pechhuak

PM-Surya Ghar Muft Bijli Yojana (PM-SGMBY) hnuaiah Rooftop Solar bun te hnena Mizoram sawrkarin subsidy a pek pawisa hlanna chu nimin khan Aizawl-a Kawlphetha Office-ah neih a ni a, Power & Electricity Minister F. Rodingliana chuan a hmanpui a ni.

Rooftop Solar Subsidy semna ah hian P&E Minister chuan Rooftop Solar hi sawrkar chuan Mega Watt 100 tal siamchhuah a tum tih sawiin, Chhiatna thleng avanga current pek theih loh khua te pawh nasa taka a chhawk theih a beisei thu leh Rooftop Solar neih tam a pawimawh thu a sawi a. Sawrkarna an chan hnuah Electric bill ba avanga sum chawi thin cheng vbc. 5 chuang an neih thin te chu tunah chuan a reh tawh tih sawiin, Electric man ba an pek that avangin lawmman nuai 100 tel an dawng tawh zawk niin a sawi a, Sawrkar thar hnuaiah current tha lo viau anga sawi a ni chungin, kum hmasa lam aiin kum kaltaa khan darkar 700 chuangin current hi a eng tam zawk niin a sawi bawk.

Rooftop Solar hi State tam takah chuan Central sawrkar chiahin subsidy hi an pe a, Mizoram hi State anga subsidy pe hmasa ber an nih thu Power Minister chuan sawiin, Central hian subsidy hi Watt a ziring Rs. 45,000 atanga Rs. 1,65,800 thleng a pe a, Mizoram sawrkar pawh hian central subsidy pek zat dawn an pe ve bawka ni.

Mizoram-ah hian rooftop solar bun thei Company hi 12 an awm mek a, a Company-a zirin an rate erawh a inang lo a, 1kWp bun duh tan Company zinga a titlawm ber chuan Rs. 77,000-in an bun sak thei a, subsidy pek an nih chuan cheng 32,000-in an bun thei tihna a ni. Rooftop Solar hi heng Mizoram-a company te hian 1kWp atanga 10 kWp thleng an bun sak thei a, a Watt a zir hian a bun man a inang lo a, chu bakah AMC huamchhung leh an bunna tur hmun a zirin subsidy pek zat hi a inang lo thung.

Rooftop Solar hian a hranpa-in battery a nei lo a, Rooftop Solar ten Power an siamchhuah hi a neituten an hman hnua hman bang an la neih chuan Grid (electric department hrui) a thawnchhuah a ni ang a, P&E lam chuan heng kawlpheta thawnchhuah zat (unit) hi a lo chhianchhiah dawn a. Heng Unit thawnchhuah zat leh mimalin current an hmanzat chu electric bill-ah an siamrem (adjust) thin dawn a. Hmaral aia thawnchhuah a tamna unit hi Financial Year tawpah P&E Dept.-in Unit khatah Rs. 4.82 in an leisak zel a ni.