District tina District Facilitator nei turin hma la

LESDE Minister Lalnghinglova Hmar chuan, District zawng zawnga District Facilitator nei turin sawrkarin hma a la mek tih a sawi.

Nimin-a Mizoram Assembly thutkhawmah LESDE Minister Lalnghinglova Hmar chuan Member te zawhna chhangin, District zawng zawnga Labour, Employment, Skill Development & Entrepreneurship (LESDE) Department Office dah chu sawrkar ngaih pawimawh a nih thu a sawi a, a bikin Hnahthial District a dah turin sawrkar chuan a ngaihtuah mek tih a sawi a, Office din hma pawhin Labour Welfare te tan District tinah District Falicitator dah turin ruahman a ni, a ti.

Labour Employment, Skills Development & Entrepreneurship (LESDE) Minister Lalnghinglova Hmar chuan Mizoram Building & Other Construction Workers Welfare Board (MBOCWWB) sum hmangin zirna lamah na taka kal an tum thu a sawi a, MBOCWWB sum chu zirna atan hman theih a nih thu sawiin, “Model School pali aia tlem lo din kan tum. Labour fate luhna tur sikul tha tak din tha kan ti a, a tul chuan Zirtirtute pawh ngaihtuah belh ila kan ti. MBOCWWB-a sum tlingkhawm hmangin zirna lamah na takin kan kal dawn,” a ti.

Siaha District-a MYC Office a thawktu 2 ban-a an aia thawktu dang lak chungchangah party mi induhsakna a awm nia Siaha Bialtu MLA Dr. K. Beichhua zawhna chu LESDE Minister chuan, MYC chu mahni a inrelbawl tura thuneihna hranpa nei a nih avangin a hriatpui loh thu leh thu chiang zawk zawtin ziaka chhanna pek a tum thu a sawi a, hetihlai hian MYC hna lak dan phungah sawrkar hmasa a kalpui dan chu chhunzawm lovin, changtlung zawka hna lak dan ruahmanna siam tum a nih thu a sawi a ni.