Inbe turin Assam hnenah lehkha thawn leh tawh

Home Department chuan ramri buai chungchang inbiakna atan Assam sawrkar hnenah lehkha a thawn leh tawh. Home Department hotute sawi danin tun tum hi lehkha vawi thum an thawnna a ni tawh a, a hmasa pahnih an thawnte chu chhanna an la dawng lo a ni. 

Nikum August ni 9-a Aizawl State Guest House-a Mizoram leh Assam sawrkar aiawhte inbiakna-ah khan kumin March ni 31 hma ngei a Minister 2-te inbiakna chhunzawm turin dah a ni a. Hemi bawhzui hian Home Department chuan Assam sawrkar Official-te hnenah Minister pahnih inbiak hma a ramri buai chungchang kimchang taka lo sawiho nise tiin rawtna an thlen a, chhanna an la dawng rih lo a ni. Home Department hotu pakhat chuan Minister-te an inbiak hma ngei a Official-te’n engkim lo relho phawt chu thil nihphung tur leh inremna atana pawimawh a an ngaih thu Akashvani Aizawl a hrilh a. A tul ang ang kimchang sawiho a nih hnuah Minister ve ve te remtihna lak kha thiltih dan tha ber ni a an ngaih thu a sawi bawk a ni. Ramri chungchangah hian Mizoram leh Assam Minister-te hi vawi 4 an inbe tawh a. Aizawlah vawi 3 leh Guwahati-ah vawi 1 an inbe tawh a ni.