RBI buatsaih Financial Literacy Week 2025 hawnna Mizoram Governor in a hmanpui

Mizoram Governor Gen. (Dr) Vijay Kumar Singh chuan Reserve Bank of India (RBI) buatsaih Financial Literacy Week 2025 chu nimin khan hmanpuiin Sum leh pai enkawl chunchang inzirtirna lehkhabu (Financial Literacy Booklet) Mizorama Library hrang hrang 513 a dah tur chu a tlangzarh nghal bawk.

Mizoram Rural Bank (MRB) Head Office Auditorium-a Financial Literacy Week 2025-ah hian Governor chuan Sawrkar laipui thiltum pawimawh tak, ram intodelha India siam tura hmalakna 'Viksit Bharat -2047' tihlawhtling tura Financial Literacy Week kalpui a ni leh RBI-in kumtin mi nawlpui thleng pha inzirtirna an buatsaih thin chu lawmawm a tih thu a sawi a. Kumin Financial Literacy thupui atana Inchhung khura pawimawh tak hmeichhiate zirtirna lam hawi, 'Financial Literacy - Women's Prosperity' tih thlan a ni chu lawmawm a tih thu sawiin, hmalakna tur thupui thlante hian chhungkaw dinhmun inchen lo tak taka khawsa hmeichhiate chakna leh thiamna a pek ngei a beisei thu a sawi bawk.

Governor chuan tunlai thiamna sang zelah sum pai enkawl dante pawh technology behchhan a nih tak avangin hei hian kawng hrang hrangah hnathawh a tih awlsam phah thu a sawi a, hemi kaltlanga sawrkar laipui Scheme hrang hrang Credit Guarantee, Social Security leh Entrepreneurship chungchanga hmalaknate a tarlang a. Mizoram State chhunga Bank leh Financial Institution zawng zawngte chu mipuite'n Bank an dawr vek theih dan turte, Social Security Scheme leh Credit Guarantee System hmang tangkaitu an nih vek theih dan turte ngaihtuaha hma la turin a chah a. Thuthar thendarhtute pawh Financial Literacy Week hmalakna te puanzar leh mipui zirtir kawnga theihtawp chhuah turin a sawm a ni.

He hunah hian RBI Aizawl-a General Manager leh Officer-In-Chage T. Lhungdim chuan Reserve Bank of India-in kum 2016 atangin kumtin Financial Literacy Week (FLW) a hman thin thu leh kum 10-na hmel a hmuh tak thu sawiin, “He programme hian a tum ber chu Campaign chhunga thupui siamte mipui hnena a tam thei ang ber zirtir a ni,” a ti a. RBI chuan tunkar chhung hian sum leh pai inzirtirna 'Mass Media Campaign' chu thupui thlan bik hmangin theihtawpin a kalpui dawn thu a sawi bawk a. Ani bakah hian Pankaja Borah, Officer-In-Charge, NABARD, Mizoram Regional Office; Hubert S.Z. Khobung, Regional Manager, SBI, Mizoram RBO; Sheryl L. Vanchhong, Chaiman, MRB leh Lallungmuana, CEO, MCAB Ltd. te pawhin thu an sawi bawk.

Nimin vek khan T. Lhungdim, General Manager leh Officer-In-Chage, RBI Aizawl chuan Financial Literacy Van a vailiam bawk a, he Van hian he hun hman chhung hian District panga - Aizawl, Serchhip, Lunglei, Hnahthial leh Saitual ahte a kalkual thin dawn a ni.