National Highway thawmthat hna kal muang in mipuite harsatna nasa takin a thlen - Governor

Mizoram Larsap Gen. (Dr) Vijay Kumar Singh chuan Kolasib District chhunga National Highway thawmthat hna kal muang chuan mipuite harsatna nasa takin a thlen tih a sawi.

Governor hian Inrinni khan Kolasib tlawhin Kolasib DC Conference Hall-ah Sawrkar Department hotute, khawtlang leh tlawmngai pawl hruaitute a kawm a, he hunah hian Governor chuan Kolasib District chu Mizoram luhka leh chak lakna pawimawh tak a nih avangin Larsap a nih hnua tlawh hmasak bera a neih thu sawiin, Kolasib District chhunga National Highway thawmthat hna kal muang chuan mipuite harsatna nasa takin a thlen tih a sawi a. NHIDCL hnuaia Four Lane kawng laih turah compensation leh Forest Clearance chungchangah te harsatna tam tak sutkian a nih tawh thu sawiin, hna thawh theih hun chhung a tlem avangin NHIDCL hotute chu a rang thei ang bera chak taka hma la turin a hrilh a; harsatna a awm a nih pawhin amah hrilh hre zel tur leh puih a inhuam reng thu a hrilh a. Dan leh thupek kenkawh kawngah thawktu indaihlo chunga Enforcement Agency te'n theihtawp an chhuah thin chu lawmawm a tih thu sawiin, thalaite nun tibuaia ram tana hmelma lian tak ni mek ruihhlo do kawngah tanlak lehzual a tul a, ruihhlo tawlhruk engemaw zat man ni mahse, man loha kaltlang pawh a awm nual avangin hemi kawngah hian a huhova kan tanrual a tul a ni, a ti bawk.

Governor Gen (Dr) Vijay Kumar Singh chuan sawrkar laipuiin mipuite hamthatna turin Scheme tha tak tak a duan thu sawiin, heng Scheme-te hian mipuite a thlen a, a tum ang tak a thawh theihna atana hmalak chu kan tihmakmawh a ni tih a sawi a. Kan hnathawh dan leh kan thlen chinte chiang zawka kan hriat theih nan leh awmze nei zawka hma kan lak theih nan Dashboard felfai tak neih a, chuta tanga kan thawh tawh chin leh kan hmabakte kan in bihchian fo thin a pawimawh takzet a ni, a ti a. Loneih leh huan thlai siam kawngah tanlak lehzual a ngaih thu sawiin, tharchhuah mai nilo, a hralhchhuahna tur lam thlenga kan ngaihtuah tel a ngai a, Agency hrang hrangte nen pawh inthlunzawm kan mamawh a ni, a ti a. Hmunhma nghet nei lova tlangram loneih chuan nghawng thui tak a nei tih pawh sawiin, nakin hun daih tur loneih dan tha zawk leh hlawk zawk kan ngaihtuah a pawimawh a, hemi kawngah hian mithiamte'n loneitute kan puih a tul hle a ni, a ti bawk.

Larsap hova inkawmna hun hi Kolasib DC Robert C. Lalhmangaiha chuan kaihruaiin District chanchin a sawifiah bakah Kolasib SP David H. Lalthangliana pawhin venhimna kaihhnawih hmalaknate te a sawifiah a. Kolasib-a hun a hman zawh hian Larsap hian Vairengte-a Counter-Insurgency and Jungle Warfare School (CIJWS chu a tlawh leh bawk a ni.