Airport chungchang ah AAI dawr leh tum niin Draft MoA buatsaih hun chhung pawhsei a ni bawk

Indian Air Force (IAF) hnena Lengpui Airport hlan dan tur chungchang zirchiang mektu, Working Committee on Lengpui Airport-in Draft Memorandum of Agreement (MoA) an buatsaih hun chhung chu pawhsei a ni a, Chief Minister Lalduhoma chuan AAI dawr an nih leh dawn thu leh a rem loh chuan huaisen taka an kal a ngaih dawn thu a sawi bawk.

Working Committee on Lengpui Airport-a Chairman leh Adviser to Chief Minister (Finance & Planning) TBC. Lalvenchhunga sawi danin IAF kuta Lengpui Airport hlan chungchanga thil pawimawh hmasa, MoA chu Working Committee lamin an buatsaih mek a, hetihlai hian Village Council leh Local Council inthlan vangte-in sawrkarah an buatsaih hun chhung pawhsei an dil a, an dil anga pawhsei niin May 27, 2025 thleng hun pek an ni a. Ruahmanna hmasaah chuan MoA hi thla thum, February, 2025 hma a peih fel tur a ni.

Hetihlai hian Assembly Session neih mekah Zirtawpni kalta khan Tuirial bialtu MLA K.Laldawngliana Private Member Resolution 'Mizoram Sawrkar-in Lengpui Airport, Indian Air Force kuta hlan emaw hralh tum a hma a lak mek hi tha ka ti lova, ti tawp rawh se' tih chu hun engemaw chen sawiho anih hnuah hnawl a ni a. He Resolution sawihona khaihkhawmtu Chief Minister Lalduhoma chuan, “Sawrkar lai apiangin Lengpui Airport hi kan mangan pui a, sawrkar kal tawhte pawhin AAI kutah hlan an lo tum tawh a, mahse an theih loh avangin Vawiin hi kan thleng ta a ni,” tiin “Kan tana tha turah chuan huaisen takin kan ti ang a, ram tana tha lo chu kan ti lo ang,” a ti a. Chief Minister chuan AAI ai chuan IAF kuta hlan chu tun dinhmunah chuan a tha zawk tih sawiin, “AAI hi chuan a hlawkna tel vek an tum bakah ram neih hlen an tum avangin kan tan phal chi a ni lo a. IAF hi chuan tuna Terminal Building ni lo, ram lehlam hi changin Runway dang an siam ang a, a ram hi pe hlen lovin kan hawh tir mai dawn chauh a ni,” a ti a. IAF kuta Airport hlan chu an duhthusam a ni bik lo tih sawi bawkin, “Finance Commission an lo kal hunah a enkawlna tur sum vbc. 1000 vel kan lo dil anga, min pek theih chuan enkawl chhunzawm hi kan duhthusam a ni a. Hei hi a theih loh chuan AAI hi kan dawr chhunzawm leh anga, a rem loh chuan huaisen takin kan kal a ngai dawn a ni,” tiin Lengpui Airport hralh/hlan tum tih chu an la dai pha lo niin a sawi bawk.

He sawihona hunah hian Opposition Leader Lalchhandama Ralte pawhin Lengpui Airport chu Mizoram rohlu leh Airport hmasawn chak, intodelh chho mek a ni tih a sawi a. “Indian Air Force in hmarchhaka Airport an enkawl a thatlohzia kan hmu a. Lengpui hi Airforce kutah hlan ta ila Defence chauh an ngaihtuah dawn a. Chuvangin an kuta hlan loh hram kan duh a, Airport Authority of India nen indawrna tihtawp tawh kha tihnun leh ngei nise kan duh a ni,” a ti bawk.