ZPM in thlai thar hralhna a rinawm loh pawi ti

ZPM Party chuan sawrkar in thlai thar lai a kalpui mek laia kuthnathawktu thenkhat ten rinawm lohna an lantir nghal mai chu pawi an tih thu an sawi.

Nimin-a thuchhuah an siamah ZPM Media & Publicity Department chuan Kalphung thar mipui Sawrkarin kuthnathawktute Ban-a kaih Policy a taka a kalpui mek laiin, February ni 20-a Sawrkarin Sawhthing a lei, khaw pahnih atanga thawnchhuahte chu a chhe hle tih hmuhchhuah a nih thu leh a latu Mizoram sawrkar in a thawhpui Reliance Company te pawhin Sawhthing hi thawn chhunzawm tawh rih lo tura thutlukna an siam hial chu a hnam anga mualphona ah an ngaih thu leh pawi an tih thu an sawi a. Mizoram Agricultural Marketing Board hruaituten Sawhthing lei leh hralh chungchangah 'Mizote chu hnamdang in sumdawnpui tlaka min ngaih theih nan kan rinawm tur a ni a, kan Sawhthing hralh turte pawh a fai tha tur a ni' tiin vawi tam tak mipui zirtirna thu an lo au chhuahpui tawh hnua, khaw thenkhata kuthnathawktuten zawm duh lo a, Sawhthing fai tha lo leh hralhchhuah tlak loh an thawnchhuak hian Sawrkar hmalak lehzelna turah pawh harsatna a thlen mek niin an sawi a, kuthnathawktu rinawm tak takte tan pawh harsatna lian tak an thlen mek niin an sawi.

ZPM Party chuan Kuthnathawktute chu Sawrkar Flagship Programme hlawhtlin leh hlawhchham kawngah mawh an phur lian hle tih inhriaa tun hnuah hetiang thil hi a thlen nawn tawh loh nan kuthnthawktute chu rilru dik tak pu turin an ngen tih an sawi bawk.