Serchhip District-ah sawrkar in Sawhthing lei tanin nimin-ah quintal 1216 buk hman a ni

Mizoram sawrkar Flagship Policy ‘Ban a Kaih’ hnuaia Sawhthing lei leh hralh chhuah thawhkhatna chu nimin khan Mizoram hmun hrang hrangah kalpui tan a ni a, Serchhip District-ah pawh Sawhthing hi leiin Sawhthing lei te hi hmunpui lamah thawnchhuah leh nghal a ni.

Mizoram sawrkar in ruahmanna a siam angin nimin atang khan Mizoram hmun hrang hranga Secondary Collection Centre atangin Sawhthing hi lei tan a ni a, Serchhip District-a SCC hrang hrang 7-ah te pawh Sawhthing hi lei niin DAMC ruat Supervisor ten an bial SCC theuh an tlawh a, Sawhthing lei sa Truck in a phurhchhuah te chu an vailiam bawk a ni. Nimin tlai thlenga hriat theih chinah Serchhip SCC, Chhiahtlang a Supply Kudam-ah Sawhthing quintal 100 buk hman a ni a, Chhingchhip SCC-ah Quintal 120 leh Thenzawl SCC-ah quintal 131 buk a ni a, Khawlailung chu buk tamna ber niin quintal 275 buk a ni a, Lungpho SCC-ah quintal 30 buk ni bawkin East Lungdar SCC-ah quintal 260 buk a nih bakah North Vanlaiohai SCC-ah quintal 300 buk a ni bawk a, nimin bik-a Serchhip District chhung SCC hrang hranga Sawhthing hralh tura buk zawng zawng hi a vaiin quintal 1216 a ni.

Serchhip District Agriculture Marketing Committee (DAMC) Chairman leh Bawrhsap Paul L. Khuma chuan nimin khan Chhiahtlang-a Secondary Collection Centre (SCC) chu tlawhin loneitute tharchhuah Sawhthing quintal 100 Truck in a phurhchhuahte chu a vailiam a, heng Sawhthing te hi Sairang panpui nghal a ni a, Bawrhsap hi Serchhip-a District Agriculture Officer (DAO) Lalchharliana, DAMC Member Secretary leh Addl. DC Lalrinzuala, SDO (S) F. Lalnisai bakah SDC Dr. Marilyn Lalruatkimi te chuan an tawiawm a ni.

Sawrkarin ruahmanna a siam angin Serchhip District-a SCC hrang hrangah hian thla khat chhungin Sawhthing kg 5,25,000 lei a ni dawn a, chumi senso tur atan chuan Serchhip District tan Rs.2,62,50,000 ruahman a ni a, Farmer te Bank Account-ah Direct Benifit Transfer hmangin Sawhthing leina pawisa hi thun zel tura rua-hman a ni.

ZPM Party chuan nimin khan thuchhuah siamin Mizoram Sawrkar Flagship Programme, Bana Kaih Handholding Scheme leh ZPM Party Policy tihhlawhtlin nan District hrang hranga Secondary Collection Centre atanga kuthna-thawktute thlai thar Sawhthing kg. ah Rs.50/- a lei tan a ni chu lawmawm an tih thu an tarlang a, ZPM Party chuan 2023 MLA General Election Campaign-na ah ‘Bana Kaih Handholding Policy’ hi an lo tlangaupui tawh tih sawiin, mi thenkhat chuan an tihhlawhtlin theih beisei pui lo hle mahsela Kalphung thar mipui Sawrkar chu kuthnathawktute hmangaihtu leh khaichhuah tumtu a nih tlat avangin Pathian zarah an Policy a lo hlawhtling chho ta zel tih an sawi a. “Hetihlai hian mipui zingah party hrang hrang kan awm avangin Eptu Party lamte chuan Sawrkar ruahmanna sawiselna tur kawng hrang hrang an dap mek a, heng inchirh thehna te avang hian kalphung thar mipui Sawrkar hi a zam mai dawn lo a, kuthnathawktute tan ke a pen zel dawn a ni,” an ti.

ZPM party thuchhuah chuan tunah hian Mizoram Sawrkar chuan Secondary Collection Centre hmun 62 a ruahman atangin Sawh-thing hralh thawhkhatna hi kalpui mek tih pawh sawiin, a tahtawl zelin Sawrkar chuan Sawhthing lei hi a chhunzawm zel dawn tih an sawi a, ruahmanna felfai tak leh awmze nei taka kalpui a ngaih avangin mipuite pawhin Sawrkar ruahmanna ngaichang zel turin an ngen a, “A vawi khatna a ni a, ruahmanna famkim tawk lo a lo awm a nih pawhin Sawrkarin ngaihtuahna a seng chho zel dawn,” tiin an tarlang bawk a ni.