Finance Commission in Mizoram Governor an kawm

Mizoram a rawn zin 16th Finance Commission Chairman Dr. Arvind Panagariya leh Member dangte chuan nizan hmasa khan Larsap Gen (Dr) Vijay Kumar Singh chu Raj Bhavan-ah an kawm.

He inkawmna ah hian Larsap chuan Mizoram state dinhmun zirchianna nei tura rawn tlawhtu 16th Finance Commission Chairman leh Member zawng zawngte thinlung taka a lo lawm thu sawiin, Mizoram tana pawimawh leh tul hrang hrangte a sawipui a, Mizoramin chhiah (revenue) a lakluh tam loh avangin sawrkar laipui a rawtna an thlen hunah pawh hriatthiamna nei turin a chah a ni. Larsap chuan Mizoram chu tlangram a awm a nih avangin hmun dangte aia hmasawnna ruhrel siam a harsat dante a hrilh bakah, then-awm ram buai avanga raltlanin an pan nasat thu leh hemi buaipui kawnga harsatna tawhte a sawi lang bawk a. Mizoram kaltlanga ruihhlo tawlh a hluar nasat avangin hemi do kawngah hmalak nasat a tul tih sawiin, dan leh thupek kenkawh kawnga mamawhte thawmthat a tul hle a ni, a ti a. Airport tihchangtlung chungchang bakah thalaite tana hna tam zawk siam a nih theih nana hmalak a tul thu a sawi bawk.

Sawrkar laipui leh State sawrkar inkara April ni 1, 2026 atanga chhiara kum 5 chhung chhiah lakluh insem dan tur zirchiangtu 16th Finance Commission hi India Danpui Article 280 hnuaiah December 31, 2023 khan din a ni a, Chairman bakah hian Full Time Member mi 4 an awm a. Mizoram-a lo kal te hi Chairman Dr. Arvind Panagariya bakah member dang Ajay Narayan Jha, Annie George Mathew-i leh Dr. Manoj Panda te niin, Official pawimawh dangte'n an rawn tawiawm bawk a ni.

16th Finance Commission atanga lo kal te hian Vawiin hian Serchhip District an rawn tlawh dawn a, zan an riak nghal dawn a ni.