NITI Aayog Member in ZMCH-a hnathawh enletna hun a rawn hmanpui

NITI Aayog Member Dr. Vinod Kumar Paul chuan natna hmuhchhuah hma chu hriselna lam leh damlo enkawlna atana thil pawimawh tawpkhawk a nih thu a sawi.

Zoram Medical College & Hospital-in an hnathawh an enletna hun hmanpuia zan khat riak-a Mizorama rawn zin NITI Aayog Member Dr. Vinod Kumar Paul chuan hriselna kawnga thawhna chuan mitin a thleng pha tur a ni a, chumi atan chuan Primary Health Centre te, Wellness Centre te leh Health Sub Centre te tihchangtluna thuamthat a ngai a ni, a ti a. Mipui hriselna lam atana thawktute chu kum 3 emaw, kum 4 emaw chhung vela Ngawr natna, Sikserh, Phar natna, German Sentut (rubella) leh Sentut (measles) te tibo tura nasa leh zuala tan la turin a sawm a ni.

He inkhawmah hian Health Minister Lalrinpuii, Principal Economic Director Anna Roy, NEC Economic Advisor Sherry Lalthangzo te an tel a. ZMC&H thuneitute chuan Dr. Paul hnenah hian an mamawh hrang hrangte an lo thlen a. Chu’ng zingah chuan kum 2025-2026 Session chhunga Master of Medicine leh Master of Surgery Class hawn phalna te leh Mizoram-a Doctor indaihlohna sutkiante a tel a. Ministry of Health & Family Welfare-a ZMC&H tihchangtlunna atana cheng vbc. 313.84 dil mek pekchhuah thuai nise an duh thute an sawi bawk a ni.