Mizoram-ah NAKSHA Programme a khuhhawn a ni

National Geospatial Knowledge-based Land Survey of Urban Habitations chu Mizoram-a kalpui ve turin niminpiah khan khuhhawn a ni.

NAKSHA tia lam National Geospatial Knowledge-based Land Survey of Urban Habitations hi Ministry of Rural Development hnuaia Department of Land Resources in Central Sector Scheme kal mek DILRMP hnuaia Programme thar a ni a. He Programme hnuaiah hian India khawpui 153 te chu Pilot project atan thlan niin chung zingah chuan Aizawl South (AMC Ward XI to XIX) huamchhung chu Mizoram atanga thlan a ni a. He programme khuhhawnna hi India ram pumah a ruala kalpui niin Sawrkar laipui-ah chuan RD Minister Shivraj Singh Chouhan chuan Raisen, Madhya Pradesh-ah a tlangzarh a. Mizoram-ah chuan IWRD Auditorium-ah Revenue Minister B. Lalchhanzova hovin hun hman a ni.

He hunah hian Minister chuan NAKSHA kaltlanga khawpui Land Record tih changtlun dan tur sawifiahin, Aizawl South Area chu Oblique Angle Camera leh LiDAR Sensor te hmanga Drone emaw, Helicopter a thla lak anih hnuah 3D Map teh theiha siamchhuah a nih dan tur te, chu chu leilung ah finfiahna neih leh vek a nih hnuah Final Map siam a nih tur thute a sawi a. Map chu 3D anih dawn avangin ram pass zawng zawng chhinchhiah anih bakah ramchhunga awm In leh building te pawh teh theih in a awm vek dawn a, chu chu Revenue Department leh UD&PA te, AMC te, Disaster Management lam mai bakah khawpui planning lam thleng atan hmanraw pawimawh tak a nih tur thu a sawi bawk a. Programme a hlawhtlin theih nan tlawmngaipawl leh khawtlang mipuite thawhhopuina a ngen nghal bawk a ni.