PM hlui sunna hun hman a ni

Nimin-a Mizoram Legislative Assembly thutkhawm ah India Prime Minister hlui, nikum a thi ta Dr Manmohan Singh-a sunna hun hman niin ngawi rengin Minute khat chhung Member te an ding a ni.

Nimin-a sunna hunah hian House Leader Lalduhoma chuan, Dr. Manmohan Singh chu politics-ah a zuanluh hma pawhin India ram tan a tha thawh hlawk tak a ni tih a sawi a, ram tan hna pawimawh leh lian tak tak lo chelh tawh a ni tih sawiin, chung zingah chuan Governor of the Reserve Bank of India pawh a tel thu a sawi a ni. Chief Minister Lalduhoma chuan Dr. Manmohan Singh chu India economist leh Parliamentarian ropui tak a ni tih pawh sawiin, Union Finance Minister a nih lai kum 1991-1996 kha India ramin sum leh pai dinhmuna hun khirh tak a tawh lai niin a sawi a, chu hun khirh leh hun thim siam tha tura Liberalisation Budget hmanga huaisen taka hma a lak ngamna chu a chuanawmin India ramin bung thar a chuan kai lehna a nih bakah, khawvel in Economist ropui tia an hriatna a ni ta niin a sawi.

Chief Minister Lalduhoma chuan, Dr. Manmoham Singh-a’n India leh ram danga thawhhona tur a duante chu thil pawimawh tak niin tun thlenga India ramin a chhawr tangkai an ni tih sawiin, National Rural Health Mission te, National Rural Employment Guarantee Act bakah Right to Information Act te chu a hun laiin dan puitling a hlankai an ni a, ram leh hnam tana a hna thawh te chu a ngaihlu in a chhuang hle tih a sawi bawk.

Leader of Oppostion Lalchhandama Ralte pawhin Dr. Manmohan Singh chu India ram Economy tluchhia siamtha tura India in a chhuan leh neih that a ni tih sawiin, India fa chhuanawm, mipui tam si economy chak lo taka awm pawh a khawhawi thak a, hmasawnna thlentu a ni, a ti. Siaha bialtu MLA Dr K. Beichhua leh Lawngtlai West bialtu MLA C. Ngunlianchunga te pawhin a uina thu an sawi bawk.