Serchhip District Hospital-a Ultrasound khawl thar mipuite hman theih turin Chief Minister in a hawng

Serchhip Bialtu MLA leh Chief Minister Lalduhoma chuan nimin khan Serchhip District Hospital-ah Samsung V6 Ultrasound khawl thar a hawng a, he khawl hmang hian nu naupai lai chu enfiah nghal niin Chief Minister ho hian khawl thar lawmna inkhawm neih zui a ni bawk.

Eco Savior Foundation kaltlanga hmuh Samsung V6 Ultrasound khawl thar hi Chief Minister hian Serchhip Distruict Hospital TRAUMA Building-ah hawngin he khawl hnathawh dan te a enpui nghal a, hemi hnua Serchhip Kawnpui VC Hall-a Khawl that lawmna inkhawm neih ah Chief Minister chuan sawrkar sum engmah seng lovin Ultrasound khawl thar, tunlai thiamna thar ber hmang chi, khawvel huap pawha a tha pawl tling phak kan nei chu lawmawm a tih thu leh a buaipuitu Eco Savior Foundation, Kolkatta chungah an lawm thu a sawi a. CSR Fund tangkai theih zia hrechiangtu chu Serchhip mipuite kan ni tih sawiin, “Vawiina kan sak mek Hospital Building sakna bul ber pawh hi CSR a ni. CSR hi Companies Act dan hnuaia mi, sawrkar sum seng lova hmasawnna hna tam tak thawh theihna hnar a ni. A hmang tangkai thei tur hian Society emaw NGO, Income Tax 12A & 80G registration nei nih a ngai a. He registration nei NGO kan ngah a, annin thawhpui tur Company an dap chak chuan kan ram tan hlawkna tam tak kan hailut dawn tihna a ni,” a ti.

Sawrkar chuan a pawimawhzia an hriat avangin CSR Cell chu Chief Minister Office-ah an din tih Chief Minister chuan sawi bawkin, “UNDP nena tangdunin Bangalore-ah CSR Conclave te an zu buatsaih a, CSR pe thin Company lian thahnem tak an zu kawm a. Mizorama hetiang lama tui mite pawh kokhawmin Awareness Programme an buatsaih tawh a. Conclave lian tham nei turin an inpuahchah leh mek,” a ti.

Serchhip damdawi In chu an theih ang angin an thuam mek tih pawh Bialtu MLA leh Chief Minister Lalduhoma chuan sawiin, “Kan hman mek Lung enna (ECG) hi lam hla tak atanga Doctor thiam zawkten live-a 5G connection ngata an rawn enpui theih khawpa khawl tha a ni. Nikum October thla tirah khan Serchhip Hospital-a dah tur 3D Dental Laboratory ka rawn hawng tawh bawk a. Hospital building thar kan sak mek avangin Govt. Serchhip College Campus-ah kan dah rih a. Industrial Revolution 4.0 huanga mi, 5G connectivity technology nei tho a ni. Tin, he 3D Lab kan hawn rual khan Mobile EGC device leh Drip Monitoring System te kan hawng bawk. Building thar kan neih hunah Dialysis khawl pawh rawn dah kan tum dawn a ni,” a ti bawk.

Chief Minister chuan District Hospital Building thar sak meka harsatna awm te sukiang turin hma an lak zel thu pawh he hunah hian sawiin, Hospital chauh pawh ni lovin Nursing School tur building sak tawh, tun thlenga la hman tangkai si loh chu hman theiha siam an tum tih a sawi a. Sawrkar quarters pawh Serchhip-ah an rawn sak belh nual dawn tih sawiin, Circuit House pawh cheng vbc. 6 senga rawn sak an tum thu sawiin, Serchhip tana hmachhawp hnaivai an neih te a tarlang bawk.

District Hospital Serchhip tana Ultrasound khawl thar lawmna inkhawm hi Serchhip-a Sr. CMO Dr. LP Malsawma chuan kaihruaiin Nursing Officer K. Lalrin-kimi chuan hunserh a hmang a, Eco Savior Foundation atangin State Head C. Lalrinfela chuan report tlangpui a pe a, Samsung V6 Ultrasound hi cheng nuai 49 zet a ni a, a resolution a san bik avangin a tha bik hle niin a sawi bawk.

Nimin-a he hun hman ah hian Serchhip District Health & Family Welfare thawktute, Official pawimawh te leh khawtlang hruaitute telin, he khawl hnathawh dan tlangpui te in hrilhfiah a ni bawk.