Mirethei te Ration Card-a awmna zirchian tum

Mizoram Poor Federation chuan mirethei ten an chanvo dik tak chang turin Ration Card-ah an awm em tih enfiah tura zinchhuah an tum thu an sawi.

Nimin-a thuchhuah siama an tarlan danin FCS&CA Minister B. Lalchhanzova’n mi retheite leh Zoram mipuite dinhmun hriatchian nan kan sum lakluh ang zela kan awmna tur theuh Ration Card-ah kan awm theih nan hma a lakna chu Chief Minister leh a Cabinet ten lungrual taka an pawm-puina ah an lawmin an lung a awi tih an sawi a. Hetih rual hian khaw tinah mirethei ten an chanvo tur dik tak hi an chang em tih hriatchian an duh avangin Supplies Minister pawh an kawm thu leh thahnem a lo ngai hle tih an hriatin an lawm takzet tih sawiin, amah leh awrkar tawiawm tura a sawmna chu lawm taka pawmin a hmasa ber atan Champhai District-ah bul tanin mirethei ten kan chanvo tur dik tak Ration Card-ah kan awm em tih zirchianga chhuah an tum thu an sawi a ni.

Mizoram Poor Federation chuan kan khawsakna dinhmun a zira Ration Card eng/pawl-a awm tur ni si, Ration Card var-a awmte leh Ration Card vara awm tur ni tawh awm tak Ration Card eng/pawl-a awmte pawh an la awm thei tih sawiin, “Kan sum lakluh leh khawsak dinhmun ang zela kan nihna dik tak Ration Card kan neih hi a thianghlim a, kan khawsak dinhmun a zira Card eng/pawl atanga Card var-a kan insawn hian mi harsa zawkte tan hmun kan kian tih hi hria ila, Kristian kan nihna nen pawh a inmil hle a ni,” an ti bawk.

Hei bakah hian Mizoram Poor Federation chuan Retailer thenkhat ten Ration latute hnenah, thla thara buhfai an lak duh chuan thla hlui-ah an kutzungpui nem a ngaih thu te, thla hluiah an kut-zungpui an nem loh avanga thla tharah an Quota a thlen loh thute an sawi thin nia an hriat thu sawiin, “Hei hi inbumna a ni tih mipuiin kan hriat a tul a, hetiang thil hi tawk kan awm a nih chuan min bialtu DCSO-ah a zawhfiah theih zel a ni,” an ti bawk.