Mizoram leh Manipur inkalpawhna-a Tuivai Lei, ‘Unity Bridge’ tia vuah Chief Minister in a hawng

Chief Minister Lalduhoma chuan ‘Unity Bridge’ tia a hming vuah, Mizoram leh Manipur inrina-a Tuivai Lei chu Inrinni khan a hawng.

Cheng nuai 500 senga Tuivai lei (Bailey Bridge) dawh thar hawnna hunah hian Chief Minister Lalduhoma chuan Selling – Tipaimukh kawng hi tunhma chuan Border Road Organization (BRO) enkawl a nih thu leh Lei (Bailey Bridge) hmasa ber pawh kha BRO in an dawh a ni tih a sawi a, Tuivai Lei hi kum 1990 khan tuilian in tichhia in kum 1992-ah Mizoram PWD in a Lei inghahna (Abutment) siam tha chuang lovin, Bailey Bridge an dawh tha leh a, kum 1997 khan a tumhnih nan tuilian in a tichhe leh tih sawiin, “Kum 28 zet hman theihloha a awm hnuah Kalphungthar Mipui Sawrkar chuan mutmawh hnarmawh ah neiin kum khat lek chhungin min hruaitu Pathian zarah kan lo dawh kai leh ta hi Pathian hnenah lawmthu kan sawi a, Zofate inlaichinna tinghettu a nih kan beisei a, chuvangin a hming atan pawh ‘Unity Bridge’ kan vuah nghe nghe a ni,” a ti.

Chief Minister chuan Manipur-a kan unauten harsatna an tawh khan an mamawh engkim Mizoram lam atanga lakluh vek a tul thu leh Sinzawl lam kawng chauh chu kumtluana hman theih awmchhun a nih avangin he Lei siamthat hi a tul hle tih a sawi a. MoRTH lamin Permanent-a dawh tumin hma an la mek tih hre chungin, sum leh pai seng lutuk lova Bailey Bridge part hlui te fawmkhawm a, hun engemaw chen atana hman theih tur Bailey Bridge hi dawh a nih thu a sawi a, “Hna hmanhmawhthlak bik leh pawimawh bika kan ngaih avangin chak takin an bawhzui a, kum khat pawh a ralhmain an dawh zo a, tun thla ni 2 khan uluk takin an enchhin a, tha tawkah an ngai a. Vawiin-ah a Lei hmasa a chhiat atanga kum 28-na ah kalphung thar, mipui sawrkar chuan kan lo dawh kai leh ta a ni,” a ti.

He hunah hian Khualzahawm PWD Minister Vanlalhlana pawhin kum 1997-a Tuivai Lei chhia chuan Manipur-a kan unaute nen min daidan rei hle tih sawiin, “Kan Chief Minister leh Pu Lalmuanpuia Adviser to Chief Minister bakah Department lama ka thawhpuite bakah he Lei dawhkai a lo nih theih nana tha leh zung ngaihtuahna sengtute zawng zawng chungah lawmthu ka sawi a ni. He Lei hian Zofate inunauna lo ti nghet zel se ka duh a ni,” a ti bawk.

Tuivai Lei hawnna inkhawm hi PWD changtu Commissioner &. Secretary K. Lalthawm-mawia chuan kaihruaiin PWD-a E-in-C Er. Lalsangliana Chhakchhuak chuan Technical Report a pe a, Lei sei zawng hi ft. 200 (TDR) niin a lawn kaina Lei ft. 50 (DS) nei a, a vaia ft. 250 a sei niin Metric Ton 30 dawl zo tura ruahman a ni a, tlo leh him taka a awm theih nan 20 MT chin chauh zawhtir an phal dawn niin an sawi bawk.