Serchhip-a Chapchar Kut hman dan tur rel a ni

Thla thar March 7-a Serchhip-a Chapchar Kut hman dan tur chu nimin khan Bawrhsap Paul L. Khuma hovin sawiho a ni.
Serchhip District Chapchar Kut Organising Committee hi Serchhip DC Meeting Hall-ah thukhawmin Chapchar Kut hi March 7, 2025 zing dar 11:00-ah Serchhip Sports Complex-ah hman nise an ti a, Kut Pa atan Minister beiseiin Kut Thlengtu atan District Bawrhsap ruat a ni a, Programme hman dan tur kimchang chu Serchip Sub-Hqrs. YMA in an lo ruahman se an ti a, Power supply, Tui in tur, Medical leh Sanitation te chu a changtu sawrkar Department te kutah dah a ni a. Security chu District Police te kutah dahin a puibawmtu tur atan YMA te ruat an ni bawk.

Kumin Chapchar Kut-ah hian loneitute thlai leh thei tharchhuah te, Mizo hnam incheina leh Handloom hrang hrangte phochhuah a ni dawn a. A duh apiangte tan lei theih turin Stall engemaw zat hawn a ni dawn a ni. Chapchar Kut-ah hian mipui a tam thei ang ber tel turin Organising Committee chuan a sawm a. Mizo hnam lam chi hrang hrang thlir tur leh zaithiamte zai ngaihthlak tur a awm dawn a ni.