Walk for Health - Walkathon 2025 neih mek zel a ni

Health & Family Welfare Department hnuaia Mizoram Health Systems Strengthening Project (MHSSP) hmalaknain ke-a kal thatzia inzirtirna, ke-a kal runpui 'Walk for health- Walkathon 2025' chu nimin khan Saitual District-ah neih tan a ni.

Walkathon 2025 hi Saitual District-a khaw hrang hrangah buatsaih niin Keifang, Saitual, Lenchim leh Sihfa-ah te neih a ni dawn a, a hmasa ber atan tukin khan Keifang-ah neiin Keifang kawn atanga Sedai kawn thleng kawng an zawh a. Walkathon thil tum te, ke-a kal tam thatna te leh inkaichhawn theih natna ni lo (non-communicable diseases) laka invenna tha a nihzia te tarlan a ni. Walkathon hi Saitual-ah pawh chawhma lamah neih chhunzawm a ni bawk.

Walk for Health - Walkathon hi Mizoram District 5-a khaw 510-ah neih tura ruahman a ni a, khaw hrang hrangah kalpui tan mek niin he hmalaknain a tum ber chu mitinin nunphung hrisel zawk kan neih theih nan leh natna inkaichhawn theih loh- Thisen sang, Zunthlum leh Stroke te laka inven lawk theih nana ke-a kal tam inzirtir a ni.

Walkathon hi February ni 15 atanga March ni 12-ah te buatsaih leh tura ruahhman a ni a, heng District huamchhunga mipuite chu tel vek turin an sawm a. Walkathon kharna hi ropui takin March ni 21, 2025 hian Aizawl-ah buatsaih tum niin milar entawntlak tak tak ten hma hruaiin Aizawl veng hrang hrang atangin Lammual pankhawm tur a ni ang.