Mizoram sawrkarin Handholding Scheme a kalpui dan leh Healthcare lama a hmachhawp te hrilh

Chief Minister Lalduhoma chuan NITI Aayog Member Dr. Vinod Kumar Paul leh NITI Aayog Official-te hnenah Mizoram sawrkarin Handholding Scheme a kalpui dan leh Healthcare lama a hmachhawp-te a tarlang.

Mizoram-a rawn zin NITI Aayog Member Dr. Vinod Kumar Paul-a hovin niminpiah tlai khan Aijal Club-ah Chief Minister Lalduhoma leh Mizoram sawrkar-a Council of Ministers, Official pawimawh te leh NITI Aayog Officials te chu an inkawm a, he hunah hian Chief Minister chuan Dr. VK Paul-a’n Mizoram a tlawh chu vanneihthlak a tih thu sawiin, India ram tana hna a thawh tawh ropui tak tak leh sawrkar laipui-a a tangkaizia hmutu a nih thu a sawi a, a rawn tlawhna chuan rah tha tak a chhuah ngei pawh a rin thu a sawi.

He hunah hian Dr. VK Paul chuan NITI Aayog chuan ram hmasawnna nghet nei tur leh Viksit Bharat 2047 tihlawhtling turin ngaihtuahna thar (new idea) ngaihlu zel chungin hma an la tih sawiin, “Hmachhawp fel tak leh tum fel tak neiin ke kan pen mek. Kan zaa thlen kan duh hmasawnna tluantling (sustainable development) hi neih ngei kan tum tlat a ni,” a ti a. Mizoram chu kum hnih chhung India rama Infant Mortality Rate (IMR) hniam ber a ni tawh tih pawh sawiin, hei hi thil lawmawm leh hmasawnna chhinchhiahtlak a ni tih a sawi a, rawtna leh ngenna an thlen te chu a theih ang anga a lo bawhzui tur thu a tarlang bawk.

He hunah hian NITI Aayog Official ten kawng hrang hranga an hmalakna sawifiahin, State Support Missions an kalpui dan te, Digital Transformation lama hmalakna te, Aspirational District kalpui dan te, Data Analytical Unit an kalpui dan te, Atal Innovation Mission an kalpui dan te, hemi lama State leh UT te an thawhpuina State Innovation Missions chungchang te, Skills & Women Empowerment lama an hmalakna te, Health & Nutrition lama an hmalakna te leh thil dang te an sawifiah a. Mizorama hma lak dan tur rawtna an neih te pawh an tarlang bawk a ni.

He inkawmna hun hi Mizoram Chief Secretary Khilli Ram Meena chuan kaihruaiin Planning & Programme Implementation changtu Secretary Lalmalsawma Pachuau chuan Sustainable Development leh Viksit Bharat 2047 thlentir tuma Mizoram sawrkar hmalakna hrang hrang a sawifiah bawk a. Hemi hnu hian kalkhawmten sawihona hun an nei zui a ni.