Mizoram tana hmalak dan turah Mizoram sawrkar hotute leh Finance Commission te an inkawm

Mizoram-a rawn zin mek 16th Finance Commission Member leh Official lo kalte chuan nimin khan Mizoram sawrkar-a hotu pawimawh te kawmin he hunah hian Finance Department atangin Finance Commission hmasa atanga sum hmuh dan leh a hman dan te tarlan a ni.

Secretariat Conference Hall-a Mizoram Sawkar hotute leh 16th Finance Commission Member leh Official lo kalte inkawmna hunah hian Chief Minister Lalduhoma chuan 16th Finance Commission Chairman Dr. Arvind Panagariya leh Member-te lawmna thu sawiin, he inkawmna hian Mizoram tan hmachhawp duhawm leh hmakhaw eng tak a siam phah ngei a beisei thu a sawi a. Mizoram dinhmun hrang hrangte tarlangin, ram leilung zau zawng za zela 84 aia zau chu ramngaw in a tuam thu leh leilung hausakna, thing leh mau leh nungchate chenna hmun pawimawh tak a nih bakah boruak thianghlim min petu leh sik leh sa inthlakthleng nasa lutuk tur vengtu pawimawh tak a nih thu a sawi bawk. Chief Minister chuan Mizoram chu Tribal hlang deuhthaw chenna, kuthnathawk a innghat tamna State a ni chungin India ramah ziak leh chhiar thiam tamna State a nih bawk thu a sawi a. Amaherawh chu ram leilung pianhmangin a zir loh avang a inkalpawhna kawng a harsatna te, hmanraw man sang avangte leh Industry lian behchhan tur a awm loh avangte in hmasawnna ruangam duang tur chuan Sawrkar laipui puihna a tul fo thu a sawi a ni.

Chief Minister chuan Mizoram sawrkar sum lu za zela 83.56 bawr vel chu Tax Devolution leh Grants-in-Aid a nih thu pawh sawiin, za zela 16.77 vel chauh State chhung atanga hmuh a nih thu a sawi a. State dang a thleng zen zen lo khuarel chhiatna leimin, ram kang, tuilian leh ruahtui tam vanga harsatna thleng thin te chu Finance Commission chuan a ngaih pawimawh sak a tul thu a sawi bawk a ni.

He inkawmhona hunah hian Finance Department atangin Finance Commission hmasa atanga sum hmuh dan leh a hman dan te tarlan a ni a. State Sawrkar Department 29 atanga hmachhawp hrang hrang ruahman a nih dan te ngaihthlak niin mipui hriselna enkawl kawnga ruahmanna te, zirna tihmasawn tur a hmachhawp te, inkalpawhna kawng tihchangtlun a pawimawh thu te leh Sawrkar sum renchem kawng a hmalakna kalpui dan te ngaihthlak a ni a. 16th Finance Commission lam atangin thalaite thiamna leh theihna (Skill Development) tihpun a nih theih nana rawtna te, Mau hman tangkai lehzual dan ngaihtuah tura rawtna te, Nursing School leh College changtlung kalpui zel tur a rawtna ngaihthlak a ni a. Mizoram sawrkar atanga rawtna hrang hrangte chu an zirchian tur thu sawiin, Mizoram sawrkar in an lo dawnsawn dan chu lawmawm an tih thu an sawi a ni.

16th Finance Commission-te hian India ram State hrang hrang zirchianna hi kalpui mekin State 18 an tlawh kual tawh a, Mizoram hi State 19 an tlawhna niin Chairman Dr. Arvind Panagariya bakah Member dang Ajay Narayan Jha, Annie George Matthew-i leh Dr. Manoj Panda-te rawn kalin Official pawimawh dangte'n an rawn tawiawm bawk a ni.