Finance Commission lo zin

Mizoram-a ni li (4) cham turin 16th Finance Commission Chairman Arvind Panagariya leh Member dangte chuan nimin khan Aizawl an rawn thleng a, 16th Finance Commission atanga rawn kal te hi sawrkar mi pawimawh ten Lengpui Airport-ah lo dawngsawngin Hunthar Veng-a lei tlahniam hmun pawh an en nghal a. DM&R leh PWD hotu ten kum 1990 atanga kum 2024 chhunga helai hmun a leilung chet dan leh inkalpawhna kawng a harsatna hrang hrang a thlen thin dan te an hrilhfiah bawk a ni.

Ruahman lawk ang chuan 16th Finance Commission Chairman leh Member te hian Vawiin hian Chief Minister hovin sawrkar mi pawimawh te an kawm anga, chawhnu lamah Political party hrang hrang hruaitute bakah Autonomous District Council sawrkar hruaitute leh khawtlang hruaitu hrang hrangte an kawm dawn bawk a ni. Naktuk lamah ZMC&H tlawh lehin Hmuifang leh Thenzawl an tlawh nghal anga, Nilaini-ah Serchhip District tlawhin hemi ni vek hian Mizo-ram an chhuahsan dawn a ni.