Federation Enclave Sample Flat leh Community Centre thar Chief Minister in a hawng

Federation of Mizoram Government Employees & Workers (FMGE&W) te bultuma Aizawl Ainawn Veng-a Federation Enclave Sample Flat leh Community Centre sak thar chu nimin khan Chief Minister Lalduhoma chuan a hawng.

Federation Enclave Sample Flat leh Community Centre hawnna hunah hian Chief Minister chuan Federation Enclave chu kan ram hmel thar a tling chho dawn nia a hriat thu leh a lawm thu sawiin, “Aizawl hi a tawtin inkalpawhna leh vantlang hmuhma thar siam tura thil tih a harsa tawh hle a. Vawiin-a FMGE&W leh Blue Mountain Co te hmalak ang hian Aizawl chhehvela Inhmun neitute leh developer te tangkawpin Housing Complex tha tak tak, mipuite lei phak tur ngei ni si, han din nual thei se, Aizawl hmel chu nasa takin a danglamin kan changkanpui ngei ang,” a ti a. He Housing Complex hi tluang takin puitling thuai se a duhsak takzet tih a sawi bawk.

He hunah hian Mizoram Government Employee Housing Society-a Chairman Hmingchungnunga chuan kalkhawmte lawmna thu a sawi bakah FMGE&W President Er. R. Lalrammawia pawhin thu a sawi bawk a. Mizoram sawrkar hnathawkten Transfer and Posting avanga chenna In din kawnga harsatna an tawh thin chhawk zangkhai a, an tana Loan hmanga awlsam taka In saksa lei tur an neih theih nana he hmalakna hi buatsaih a nih thu an tarlang a. A dinna hmun ram hi sawrkarin a pek a nih thu leh kum 2027-ah hna hi zawh an tum dawn tih a sawi a, Booking hi nimin atangin an hawng tan anga. Kum khat chhung sawrkar hnathawk tan an hawng phawt ang a, chumi hnuah a duh apiang tan hawn zui a ni tawh ang.

Federation Enclave hi FMGE&W hnuaia Mizoram Government Employees Housing Society te chuan Blue Mountain Engineering & Services Limited nena tangdunin kum 10 vel kalta atang khan an lo buaipui tawh a. He Housing Complex-ah hian chhungkaw 350, mihring 2000 vel chen theih tura ruahman a ni. Nimin-a hawn tak Complex Community Centre building-ah hian Sample Flat an dah nghal a. Chief Minister hian Sample flat hi a en kual bakah heng Flat sak tur lei duh tute tana hauh theih hun (mass booking) a puang nghal bawk a ni. A man tur tuna an rate dinglai chu a tlangpuiin (approximate rate) 2BHK hi cheng nuai 47 vel niin, 3BHK chu cheng nuai 60 vel leh 4BHK chu cheng nuai 77 vel a ni.