Lengpui Airport chan kumkhua-na tur niin sawi

Lengpui Airport Forum chuan Mizoram sawrkar in Lengpui Airport chu Indian Air Force kuta a hlan chuan, hnam rohlu, hruaitu hmasa ten harsa taka an lo sualchhuah chu Mizoram in a chan kumkhua tawh dawn nia sawiin, lak kir leh theih a ni tawh dawn lo niin an sawi.

‘Lengpui Airport Indian Air Force kuta hlan a him lo’ tih lehkhabu niminpiah-a an tlangzarhna kaihruaitu Lengpui Airport Forum hruaitu Lalthlamuana Ralte chuan Mizoram sawrkarin Lengpui Airport chu IAF kuta hlan ngei a tum avang leh IAF hnena hlanna tur tifel tura ruat Working Committee chu February ralhma ngeia Draft Agreement tifel tura tih an nih thu a sawi a, sum harsatna avanga IAF hnenah Lengpui Airport hlan a nih chuan hnam tan pawi thui tak a sawi dawn niin an sawi.

Lengpui Airport Forum chuan Airport Authority of India kuta Lengpui Airport hlan chu an duh dan ber a nih thu he hunah hian an sawi a, kumin January 24-a Aizawl Press Club-a chanchinbumite an kawmna ah, 'Lengpui Airport Indian Air Force hnen a hlan tum chungchang tih lehkhabu-te (booklet) an lo tlangzarh tawh bawk a. Lengpui Airport Forum chuan Airport-a hmun pawimawh lai ber pahnih - Thlawhtheihna lut leh chhuak zawng zawng thununna hmunpui Air Traffic Control (ATC) Tower leh thlawhtheihna tumkawng (runway) te Mizoram sawrkarin IAF kuta a puma a hlan chuan Mizoram sawrkar chuan chung Airport ti Airport-tu berah thuneihna a nei zui thei tawh dawn lo a ni, an ti.

Airport Inpui (terminal building) atanga thlira tumkawng lehlam pang a Airport ram chin zawng chu IAF in an chang dawn a, Mizoram sawrkar tan inrawlh ngaihna a awm tawh dawn lo nia sawiin, Mizoram sawrkar chuan Airport Inpui-te, Airport venhimna (security) leh thlawhtheihna chuanman hralhna ah te chauh thu an neih tawh tur thu leh Thlawhtheihna lut leh chhuak kaihhnawih lo chinah chiah Mizoram sawrkar in thu a nei tawh dawn niin an sawi bawk.