Union MoS in Aizawl-a BJP Office a tlawh

Mizoram-a rawn zin Union Minister of State for Labour & Employment Shobha Karandlaje chuan nimin khan Aizawl-a BJP Office tlawhin Party mipuite a kawm bakah thuthar thehdarhtute a kawm nghal bawk.

Union Minister Shobha Karandlaje-i chuan India ram chu khawvel ah ram thang chak leh hmasawn chak ber pawl a ni tih sawiin, tunah pawh hian Economy-ah pawh 5-na kan nih mek thu a sawi a, Union Budget 2025-2026 ah NE te tana hamthatna tam tak a awm thu pawh sawiin, Central Sawrkar chuan Mizoram hmasawnna atan Education, Health, Agriculture leh Horticulture, MSME leh hmasawnna ruhrel (Infrastructure) siamna atana sum tam tak a Sunction a, Mipui tana hmasawnna tur sum sunction te hi hman that a nih tawh loh avangin Mizo mipui ten kawng hrang hrangin harsatna an tawk niin a sawi bawk.

Union Minister chuan PM Scheme hrang hrang PMAY (Housing For All) te, JJM (Tui Connection) te, PM Health-care ah te, PM Free Electrification ah te, Toilet siamna tur atan te leh PM Scheme dang atan pawh Central Sawrkar chuan a hun takah sum an pe vek thin tih sawiin, heng ah te hian Mizoram Sawrkar chuan tha taka mipuiin an chhawr theih nan a hun takah a pekchhuah ve zel a ngai tih a sawi a. Chutiang anih loh chuan PM Scheme kaltlanga mirethei ten hamthatna an dawn tur ang hi an dawng thei thin lo niin a sawi bawk.