Session atan Bill 8 lut tawh

Assembly Session kal mekah sawrkar atanga Dan siamna tur leh siamthatna tur Bill 8 a lut tawh.

Assembly Secretariat atanga thudawn danin Dan siam tur leh Dan dinglai siamthat tur lutte hi - Labour, Employment, Skill Development & Entrepreneurship (LESDE), Urban development & poverty alleviation (UD&PA), Finance, Higher & Technical Education, Information & Public Relations, Excise & Narcotics leh Local Administration Department atangin a ni a. LESDE hian Bill pahnih an thehlut ni a hriat a ni. Sawrkar Bill thehluh zinga ngaihven hlawh zual chu Excise & Narcotics Minister-in a putluh tur Mizoram Liquor (Prohibition) Act, 2019 siam thatna tur leh Higher & Technical Education Minister Dr. Vanlalthlana'n Mizoram State University Bill a putluh turte hi a ni a. Sawrkar Dan siam tur chhawpchhuahte hi March ni 3 (Thawhtanni) leh March ni 6 (Ningani) te putluh a sawiho a ni dawn niin Business Advisory Committee (BAC)-in Assembly inkhawm hun hman dan tur a duan lawkah tarlan a ni.

March ni 20 thleng awh tur Assembly inkhawmah hian tun thlengin House chhunga chhan chi zawhna 889 a lut tawh a, ziaka chhan chi zawhna 104 a lut tawh bawk a. House Dawhkan a dah tur lehkha pawimawh 8 a lut tawh a, Official Resolution putluh tur pakhat a a lut tawh bawk. Tarlan tawh angin tun tum Budget Session-ah hian March ni 4 khian Finance changtu Chief Minister Lalduhoma'n sawrkar kumthar (2025-2026) a Mizoram tana sum ruahman (budget) leh sawrkar kum kallai a sum dil belhna (Supplementary demands for grants for 2024-2025) chu House-ah a pharh dawn a ni.