Kalphung thar mipui Sawrkar ah PWD in hmel thar a hmu mek - Chief Minister

Chief Minister Lalduhoma chuan, Kalphung thar mipui Sawrkarah PWD in hmel thar a hmuh mek thu sawiin, thawktute pawhin tan an lak chhoh zel angaih thu a sawi a. Hmasawnna hna kal lai mek leh a nih tur ang a nih hmaa eptu Party lamin Sawrkar beih nana an hmang thin chu pawi an tih thu a sawi bawk.

PWD hotute chuan nimin khan Thara Resort Falkland-ah intuihtharna hun hmangin he hun hmanpuiitu Chief Minister Lalduhoma chuan ZPM Sawrkar hnuah PWD in hmelthar a hmu chho zel chu lawmawm a tih thu sawiin, “Engineer hna hi ram rawngbawlna hna ropui tak a ni a, mimal eizawnna a nih bakah ram tana thil tha leh rohlu hnutchhiah kawngah a taka thawktute an ni a, an lakah hian mipuiten beisei kan nei sang hle a ni,” a ti a. Engineer hna chu hna ropui leh ram rawngbawlna hna pawimawh tak a ni tih hriaa, thahnemngai taka thawk zel turin Engineer te chu a chah a. Hmun thenkhatah hmasawnna hna kal lai mek leh a nih tur ang a nih hmaa eptu Party lamin Sawrkar beih nana an hmang thin chu pawi an tih thu sawiin, “Mi hna zawhfel hmaa politics in beih nana hman hi politics ramhlui zia a ni a, mipuite pawhin heng Sawrkar tihmualpho tumtute hi ngaihdan tawk kan thiam a tul hle a ni. Chutih rualain Kalphung thar mipui Sawrkar hnuaia hna thawh reng reng a tha bik tur a ni a, hna tha tawk lo chu State Monitoring Committee ten an umzui zel dawn a ni,” a ti bawk.

He hunah hian PWD Minister Vanlal-hlana pawhin hun kaltawhah PWD chu mi tam takin Corruption tamna Department-ah an ngai nia sawiin, “Kalphung thar mipui Sawrkar ah erawh chuan chu ngaihdan chu thlak thleng turin a takin hma kan la mek,” a ti a. PWD Engineer-in-Chief C. Lalsangliana pawhin ZPM Sawrkar in PWD a enkawl mek danah an lawmin Engineer te pawhin beiseina thar an nei lian hle tih sawiin, “Engineer te hi hna thawk tha lo leh thiam lo ang lek lekin sawi kan hlawh thin leh PWD kan hmingchhe fo thin hi hrehawm kan ti a, tunah chuan sawrkar thar, hna tha taka thawh duh a lo piang ta a, PWD in hmingthatna kan khum leh thei turah kan ngai a, lawmawm kan ti takzet a ni,” a ti bawk.