Tuihna siamthar lehna turin WDC-PMKSY 2.0 leh NEIDA ten thawhhona thuthlung an ziak

Rural Development Department hnuaia tuihna siamthar lehna (springshed development) tura thawhhona thuthlung (Memorandum of Understanding) chu nimin khan Rural Development Department leh North East Initiative Development Agency (NEIDA) ten an ziak.

Memorandum of Understanding ziahna hun hi Rural Development Minister Prof. Lalnilawma Office Chamber-ah neih niin thawhhona thuthlung hi kumkhat atana ziah niin a tul ang zela pawhsei theih tura ruahman a ni a. He hunah hian RD Minister Prof. Lalnilawma chuan tuihna kiam nasat tawh zia leh mipuite tuihna humhalh kawnga tan lák a tulzia sawiin, January 2024-ah Tlawng lui chu 171.5 MLD a nih laiin January 2025-ah chuan 104 MLD a nih thu a tarlang a, kan luitui leh a hnar te humhalh a, tuihna tipung zawnga tanlak a tul thu a tarlang bawk.

RD leh PHE Department changtu Minister Prof. Lalnilawma hmalakna in Rural Development Department-in Project a kalpui mêk zinga Pradhan Mantri Krishi Synchayee Yojana - Watershed Development Component (WDC-PMKSY 2.0) chu Watershed Development hna thawk a nih avangin MGNREGS nena tangkawpin Project-in a tuam chin khua-ah te Tlawnglui fintu tuihnar tihchak thara beihpui thlák nise tiin, a hmingah pawh 'Project Tuihna- Dam khawchhuahna' tih a ni a. WDC-PMKSY 2.0 hian Springshed Development lama tawnhriat lo nei tawh NEIDA te a lo thawhpui tawh thin avangin mumal leh awmze nei zawka tuihna siamtharna tur ruahmanna siam turin Department chuan NEIDA hi thawhhona thuthlung a ziahpui ta a ni. He Thawhhona thuthlung-ah hian RD Department aiawhin R. Zarzosanga, IAS, Commissioner & Secretary leh North East Initiative Development Agency (NEIDA) aiawhin Lalrinkima Bawite, State Program Co-Ordinator ten an ziak a ni.

Project Tuihna- Dam khawchhuahna hian Mizoram chhunga lui tui, kan ei leh in atana kan hman zawng zawngte ah hmalak tum a ni dawn a. Hemi atana Springshed Development hnathawh dan tur ruahmanna, Ground Survey leh Detail Technical Report (DTR) te chu NEIDA lam hian an kalpui anga, ruahmanna siam angin WDC-PMKSY 2.0 leh MGNREGS ten tangkawpin hna an thawk ang a, Department dang pawh a tul leh mamawh ang zela thawhpui tur a ni ang.

Ruahmanna hmasa-ah chuan Tlawng lui tinzawn niin Tlawng hnar atanga hrut thla-in Tlawng chawmtu luite leh tuihna siamthar lehna tur ruahmanna siam niin Lunglei District, Serchhip District, Aizawl District leh Mamit District huam chhunga khaw 42-ah te zirchianna neih tawh a ni a. A tahtawlin hmundangah pawh zirchianna hi kalpui zel tur a ni.