Sawhthing buk mek zel a ni

Serchhip District-a Secondary Collection Centre hrang hrangah Sawhthing lei mek niin Ser-chhip Cluster-ah Sawhthing kg. 1,08,215 zet buk ni tawhin Sawhthing hralhtute hnenah Sawhthing man hi pekchhuah mek a ni bawk.
Thudawn danin Mizoram sawrkar in tun thla ni 20 atanga kuthnathawktute Sawhthing thar a lei mekah hian Serchhip District-a SCC hrang hrangah Sawh-thing hi lei a ni a, heng Centre hrang hrangah hian Sawhthing leisa hi dahkhawm niin karleh lamah heng te hi auction leh tura ruahman a ni a, kartin auction hi kalpui tur a ni ang. Serchhip Cluster ah Sawhthing hi kg. 1,08,215 buk ni tawhin, Serchhip bikah kg. 38,608 buk a ni tawh a, Chhiah-tlang-ah kg. 33,245 buk a ni tawh a, Keitum-ah kg. 9878 bukin Hriangtlang-ah kg. 15,573 leh Bungtlang-ah kg. 10,911 buk a ni tawh bawk.

Thudawn danin Serchhip District-a heng Sawhthing hralhtute hnenah hian a theih angin Sawhthing man hi pekchhuah zel a ni a, SCC tin atang hian DC Office-ah report pein heta an tihfel ang ang te chu Sawhthing man hi an pe nghal zel nia thudawn a ni bawk.

Mizoram-a Sawhthing lei sa dahkhawlna lian ber Sairang Godown chu a khah tawh avangin SCC tina Godown-ah Sawhthing hi stock rih tura hriattir an ni a, Sairang-a mi hi tunkar ah auction tan niin SCC ami te hi karleh lamah auction tan tura ruahman a ni bawk.