Minister hovin e-ram portal go-live na hun hmang

Revenue Minister B. Lalchhanzova hovin niminpiah khan e-ram portal go-live na hun hman a ni.

Directorate of Land, Revenue & Settlement Conference Hall-a he hun hman ah hian Revenue Minister B. Lalchhanzova chuan, Surveyor indaihlohna avanga ram teh tur rei tak tak nghah ngai thin chu Survey firms te e-ram kaltlanga hman theih a ni ta chuan mipui tan awlsamna nasa tak a thlen a beisei thu sawiin, Go-live a nih theih nana tihfel ngai leh siamrem ngai te siam a nih hnuah a taka mipui leh office lama thawktu ten an hmang tan thei tawh tur chu lawmawm a tih thu a sawi a. e-ram chu sawrkar langtlang, mipuite awlsamna thlentu leh eirukna dona kawnga hmanraw pawimawh tak a nih tur thu a sawi bawk. Revenue Minister chuan e-ram chu hun rei tak atanga nghakhlel taka thlir anih hnuah a taka hman tan a ni ta chu lawmawm a tih thu pawh sawiin, Chief Minister Lalduhoma chuan November ni 4, 2024 khan a hawn tawh thu leh hman nghal a nih dan te leh application pawh engemaw zat a luh tawh thu a sawi bawk.

E-ram ah hian service sawm leh pakhat (11) a awma: ram teh, ram teh that, ram then, ram pawhkhawm, ram hmingthlak leh a dangte chu Office a kal kher lovin online in mahni awmhmun atangin dil tawh tur a ni dawn a. A dil dan hi process awlsam te mah nise mahnia ti thiam lo tan pawh Common Service Centre (CSC) kaltlangin dilna te chu a thehluh theih dawn a ni.

Mipui te chuan e-ram hmang hian an dilna te an thehluh bakah, an dilna in a kentel fee zawng zawng pawh online in an pe vek thei tawh dawn a, an dilna thlen chin leh khawiah nge a tan tih te an hmu thei vek tawhin, office kal buai kher ngai lovin an thil dil thlen chinte an hre thei vek tawh dawn a ni.