16th Finance Commission in ZMCH tlawhin Serchhip District an tlawh mek

Mizoram-a rawn zin mek 16th Finance Commission Member te chuan nimin khan Zoram Medical College & Hospital (ZMCH), Falkawn chu tlawhin Falkawn VC te an kawm bawk a, nimin tlai khan Serchhip District an rawn thlengin zan an riak nghal a ni.

ZMCH an tlawhna ah hian 16th Finance Commission Member te hi Health & Family Welfare Minister Lalrinpuii leh H&FW Secretary Sangchhin Chinzah bakah ZMCH hotuten an lo dawngsawng a. ZMCH Academic Block-a Council Room-ah 16th Finance Commission Member te nen an inkawmna ah ZMCH Director Dr. John Zohmingthanga chua presentation pein ZMCH lo indin tan dan atanga tun dinhmun an thlen chin te, hmasawnna tur la awm leh an mamawh chi hrang hrangte a tarlang a. Health Minister Lalrinpuii pawhin 16th Finance Commission chungah beiseina sang tak an neih thu sawiin, ZMCH bakah Health & Family Welfare Deparment kaihhnawih thil pawimawh tak tak an hnena an thlente chu Mizoram hmasawnna atana pawimawh ber berte an nih avanga ngaih pawimawh sak tur leh a tihhlawhtlin dan kawng ngaihtuahsak turin a ngen bawk a ni.

ZMCH-a thawktute nena inkawmhona an neih zawh hian 16th Finance Commission Member te hian ZMCH fang kualin OPD, Laboratory leh Deparment hrang hrang an tlawh a, ZMCH hotute pawhin an dinhmun leh hmasawn theihna tur la awm ang angte a hmunah an hrilfiah nghal zel a ni.

Zoram Medical College & Hospital (ZMCH) an tlawh hnu hian 16th Finance Commission Memberte chuan Falkawn-a Bharat Nirman Rajeev Gandhi Sewa Kendra (BNRGSK) Hall-ah Falkawn Village Council hotute an kawm nghal a, hetah hian 16th Finance Commission Chairman Dr. Arvind Panagariya chuan hovin LAD Director Chauhnuna leh Falkawn Village Council Member ten an lo dawngsawng a. Falkawn Village Council hotute chuan Mizorama Village Council 800 chuang awm zingah an hun chep tak kara tlawh tura anni an rawn thlang chu Commission chungah an lawmthu an sawi a, Village Council inrelbawlna kalphungte sawifiahin an lo tawnhriat tawh atangin Mizoram pum huapa Village Council te mamawh leh hmasawnna tur bakah hmalak dan thar tur atana tha ni a an hriatte 16th Finance Commission hnenah hian an thlen a, sawihona hun tha takin an hmang bawk a ni.

16th Finance Commission Chairman leh Member te hian nimin tlai khan Serchhip District rawn tlawhin Thenzawl an thleng a, Thenzawl-ah hian sawrkar mi pawimawh ten lo dawngsawngin Handloom Centre leh hmunhma pawimawh dangte an enfiah dawn a, Vawiin hian Serchhip rawn tlawhin Helicopter hmangin Lengpui an pan anga, Mizoram an chhuahsan nghal dawn a ni.