LADC-ah V. Zirsanga chu CEM thar atan lakluh a ni

Lai Autonomous District Council (LADC)-a Chief Executive Member (CEM) atan Paithar bialtu MDC leh ZPM hruaitu V. Zirsanga chu nimin khan Lawngtlai DC, Cheemala Siva Gopal Reddy chuan rinawmna thu tiamtirin a lalut a, CEM atana V. Zirsanga lakluh tur hi MNF Thalai leh Congress Thalai chuan an duhlohzia an lantir thung a ni.

LADC-a sawrkar thar lakluhna inkhawm hi nimin khan Lawngtlai-a LADC Hall-ah neih a ni a, LADC Executive Secretary K. Lalthanzara chuan kaihruaiin Lawngtlai DC Cheemala Siva Gopal Reddy chuan CEM thar atan V. Zirsanga chu rinawm thu tiam tirin a lalut a ni.

CEM atan lakluh a nih hnuah V. Zirsanga chuan a mimal taka Politician zingah beih tawk nasa ber a nih hial a rin thu a sawi a, tuna a thawhpuite chu hun hmasa lamah pawh amah beitute an nih thu a sawi a, hetichung hian Pathian chuan inremlo te karah inremna siamtu atan amah chu a hmang nia a ngaih thu sawiin, LADC Sawrkar term tawite la awm chu Kalphungthar a kaihruaiin, ram in hma a sawn theih nan theihtawp an chhuahtur thu a sawi a. Eiru-a amah an puhna chu Court sang zawka thlen a nih thu leh tun dinhmunah chuan eiruk leh rukloh chungchangah engmah thu tihchian a la awm loh thu a sawi bawk a ni.

LADC-a CEM thar lakluh a nih hnu hian CEM thar V. Zirsanga chuan a thawhpui Deputy CEM atan Manghmunga Chinzah a ruat thu puangin, Executive Member atan mi pathum- K.Hre Kung, Lallawmsanga Apetow leh LR. Dingliana Chinzah te a ruat thu a puang bawk.

Hetihlai hian MNF Thalai leh Congress Thalai te chuan sawrkar lakluhna Inkhawm neih a nih dawn lai hian LADC Gate-ah hminghliauna nei ram hruaitu atan an duhloh thu aupuiin, thuziak an keng thung a. CEM thar tur leh a laluttu turte hi dan tum mah se kawng dang atanga heng mi pawimawh te hi an kal avangin tluang takin CEM thar lakluhna hi neih a ni thung a ni.